当前位置: Sawcuengh > saehmoq

Gij Cingzyienz Vahcuengh Vangz Haijveih

2017年06月26日    来源:Gvangjsih Minzcuz Bau    字号:[    ]     浏览次数:

黄海辉的壮语情缘

□ Cinz Gvailoz raiz Dahdingz hoiz

  Baengh Vahcuengh de daj bouxcoz dauq mbanj bienqbaenz bouxboqyaem swngjgaep dendaiz

  Doxgaiq boekbienq, ndwenngoenz gvaqbae riengjvaiq. Baez yaepda, Vangz Haijveih daengz Guengjsae Yinzminz Gvangjbo Dendaiz boqyaem gaenq miz 34 bi lo. De seizneix yienznaeuz dwg bouxboqyaem itgaep Vahcuengh biucinj haemq mizmingz, hoeng, naemjdaengz bouxcoz bihaenx ngamq gauhcungh bizyez dauqma ndaw mbanj guhhong haenx mbat he couh bienqbaenz bouxboqyaem swngjgaep dendaiz, de caen gyo’mbaiq Vahcuengh daiq vuenyungz daeuj hawj de.

  Bi 1980 seizhah, Vangz Haijveih Mbanjluzcinz Bingzluz Cunh Sanghgyauz Cin Vujmingz Yen gauhcungh bizyez. Bihaenx de ngamq ndaej 17 bi, bae camgya gauhgauj, hoeng, lij ca geij faen cij gauj ndaej hwnj. Gyoengq doengzhag lumj de buekguh gvaq cix doengzyiengh caeuq daihhag mbouj miz yienzfaenh, miz mbangj doeknaiq lo, miz mbangj ngiengx gyaeuj yawj mbwn diem heiq naek, miz mbangj ienq mbwn gvaiq vunz. Vangz Haijveih cix mbouj baenzneix, de nyinhnaeuz gauhgauj mbouj dwg diuzroen dandog. Youq ranz guh hong song bi le, de bungzdaengz mbat gihvei okrog bae muzlienh hagsib ndeu. Bi 1983, daengx gih youq dieg Bouxcuengh yaek baetsauq vwnzmangz Sawcuengh、haenqrengz cienzdoh doigvangq Sawcuengh. Bihaenx ndwen 6, bouxdaeuz cunhveij daezmingz hawj de bae yen Sawcuengh hagdangz camgya lauxsae beizyin, hag liux le dauqma ndaw mbanj guh lauxsae baetsauq vwnzmangz Sawcuengh. Miz mbangj doengzhag mbouj nyienh bae, naeuz hag Sawcuengh yawj mbouj raen rongh. Vangz Haijveih mbouj gangj saek coenz, giengiet fugcoengz anbaiz, de hix naemj baengh mbat gihvei neix lai hag di dinfwngz. Youq mboengq hagsib neix, de hwnq caeux ninz laeng roengzrengz hagsib, cingzcik baiz youq baihnaj. Dingjlingz seiz- neix, aen siusik ndei ndeu cienz daengz Vujmingz Yen Sawcuengh Hagdangz: Guengjsae Yinzminz Gvangjbo Dendaiz yaek youq ndaw ban ciu geij boux bouxboqyaem Vahcuengh biucinj. Lauxsae hagdangz doigawj Vangz Haijveih daengj buek yozyen maenhndei ndeu. Ginggvaq loegyaem、gaujsi、dijgenj、cwngci saemjcaz daengj,doeklaeng bouxsai ndawde cij miz Vangz Haijveih habgek. Bi 1983 ndwen 8, de youq yen Sawcuengh hagdangz hagsib liux le cigciep daengz Guengjsae Dendaiz camgya hwnj gangjvei gaxgonq beizyin. Bihaenx ndwen 12, de cingqsik diuh daengz Guengjsae Dendaiz guh hong boqyaem Vahcuengh biucinj. De goemzgyaeuj buekguh、haeujsim guh hong nyinhcaen fucwz, bi 1994, de ndaej bingz baenz bouxboqyaem itgaep. Bi 1996, de gyahaeuj Cungguek Gung- canjdangj. Bi 1997, de aeundaej aen cwngheuh “bouxguhhong senhcin Vahcuengh Sawcuengh” Swcigih Minzyijveij、Gyauveij、Minzveij fat hawj haenx.

  Baengh Vahcuengh de bienqbaenz bouxboqyaem song loh dendaiz、densidaiz

  Bi 1993 seizhah, Vangz Cucwngz (youq Cunghyangh Dangjyau hagsib) bouxvunz mwhhaenx dang fudaizcangj Guengjsae Densidaiz haenx iu gou (mwhhaenx gou youq Cungguek Sinhvwnz Yozyen hagsib) buenx de bae Cunghyangh Minzcuz Dayoz genjaeu bouxboqyaem Vahcuengh. Dou bae le haujlai baez, cungj mbouj habhoz. De gig simgaenj dwk naeuz,bicog(bi 1994) ciet gozging couh aeu boqcuengq cezmuz sinhvwnz Vahcuengh lo, seizneix lij caengz ra ndaej bouxboqyaem, ra ndaej le lij aeu son geij ndwen dem. Bouxboqyaem dendaiz lij ndei ra gvaq, cijaeu fat yaem biucinj、doeg cihsaw cingcuj、vah gangj ndaej sug couh ca mbouj geijlai lo. Hoeng, bouxboqyaem densidaiz cawz neix lij aeu da naj cingq、yiengh caeuq simsingq ndei dem. De bi 1994 daj Baekging ma Guengjsae le couh cujciz vunz daengz Vujmingz daengj dieg bae ciu vunz, doeklaeng lij dwg ra mbouj ndaej. Bi 1994 ndwen 8, bouxdaeuz Guengjsae Densidaiz caen mbouj miz banhfap lo, cij ndaej ra bouxdaeuz Guengjsae Dendaiz doxyaeng, naemj ciqyungh Vangz Haijveih bae densidaiz giemdang bouxboqyaem cezmuz sinhvwnz Vahcuengh, gaijgez gij vwndiz gaenjgip gyoengqde. Vangz Haijveih daengz densidaiz sawq loeg geij bae couh ok gingq lo, yiengh ndei、cingz yaem hawj vunz gamjdoengh. Bi 1994 ciet gozging, cezmuz sinhvwnz Vahcuengh geiz daih’it Vangz Haijveih dauqdaej youq gwnz bingzmuq cienz haeuj ndaw ranz vunzlai. Baez boq couh dwg 15 bi, cigdaengz bi 2009, Guengjsae Densidaiz ciu ndaej song boux bouxboqyaem mehmbwk. Gyoengqde daeujdaengz le, bouxdaeuz densidaiz youh hawj Vangz Haijvei son song boux neix geij ndwen. Vangz Haijveih son’gyauq gyoengqde, yiemzgek iugouz,hawj song boux de cinbu gig vaiq. Bi 2010 yenzdan, song boux vunzmoq neix hainduj gag boqyaem. Daj neix hwnj Vangz Haijveih caiq hix mbouj yungh giemdang bouxboqyaem Guengjsae Densidaiz lo. Yaep lwg- fwngz suenq, de giemdang bouxboqyaem Guengjsae Densidaiz cukcuk 15 bi, doengzseiz youh mbouj nguh cezmuz Vahcuengh Guengjsae Dendaiz cingqciengz boq ok. Cibgeij bi genhciz ngoenzngoenz cungj haenqrengz guh hong, yienghneix dangyienz baeg raixcaix. Hoeng mwh gicej cam de cibgeij bi neix dwgrengz ma?De cix riu dwk naeuz:Ciuhvunz miz gaiq ginglig baenzneix hix dwg ndei dangqmaz. Cingqsoq, boux vunz ndeu doengzseiz guh boux- boqyaem swngj dendaiz、densidaiz,neix youq boqyaem lizsij gih raeuz gig noix raen.

  Baengh Vahcuengh de byaijhaeuj densigi

  Vangz Haijveih guh loh maij loh, yezvu suijbingz cinbu gig hung. De guhbaenz le boqyaem funghgwz bonjfaenh caeuq vunz mbouj doengz, ndaej daengz haujlai bouxdingq、bouxyawj haenh. Bi 2008, de wngqiu camgya gij cingzgingj gvanghbanz《900 Coenz Vahcuengh》vih swcigih laebbaenz 50 hopbi guh haenx; bi 2015, de fanhoiz、boiqyaem 12 ciz 《Hoenx Yahvaiz》 dung’vaben. Bi 2008 ndwen 4 de camgya fanhoiz cauxguh 41 ciz《Sihyouzgi》 boiqyaem Vahcuengh. De fucwz cujyau yinzvuz ndaw heiq Dangz Swngh caeuq Vugungh boiqyaem. Dangz Swngh hengzdoengh vwnzyaj、singqcingz huzswnh、haeujheiq bingzhuz, boiqyaem haemq swnhleih. Hoeng Vugungh gvai youh manzgyaengj、mbouj dingq vunz gangj gag hengz gag guh, yaek boiq gij sing daiq miz daegdiemj singq lingz haenx nanzdoh gig hung. Ginggvaq roengzrengz geij ndwen, 《Sihyouzgi》 boiq miz yaem Vahcuengh haenx dauqdaej youq bi 2008 satbyai loegguh baenz caemhcaiq youq daiz Guengjsae boqcuengq. Gyoengq beixnuengx Bouxcuengh mwh yawj roxnyinh caenciet dangqmaz, daegbied dwg doengh boux vunzlaux Bouxcuengh youh dingq mbouj rox Vahbujdungh haenx. Bi 2010, aen heiq neix ndaej loih benq fanhoiz loegguh ciengj“ginhbungz mbefwed”sam daengjciengj vahgangj minzcuz Cungguek、minzcuz daezcaiz cezmuz haenx. Linghvaih, Vangz Haijveih lij camgya fanhoiz loegguh le banj Vahcuengh densigi《Gij Cienh Huz Hakyienh》、 《Gimz Yienz Dog Mbanjranz》、43 ciz《Suijhuj Cienh》caeuq 42 ciz《Yinghyungz Nyingz Yiuh Cienh》.

  Baengh Vahcuengh de byaijhaeuj yinzminz daveidangz

  Yinzminz Daveidangz, dwg gizdieg ciuhai yinzminz daiqbiuj daihhoih gak gaiq daengj hoihhung haenx, hix dwg gizdieg dangj caeuq bouxdaeuz guekgya caeuq gyoengq bek- singq Cunghvaz Yinzminz Gung- hozgoz banh cwngci、vaigyauh hozdung haenx. Aen diendangz neix, hawj haujlai vunz naemj bae. Hoeng, Vangz Haijveih cix baengh Vahcuengh biucinj de, gonqlaeng seiq baez cingqcingq dangqdangq yamq haeuj yinzminz daveidangz, camgya gij hong doengzsing fanhoiz song aen hoih daengx guek yinzda、daengx guek cwnghez neix. De yaenqsiengq ceiq laeg dwg bi 1987 ndwen 3 bae Baekging camgya guh gij hong Aen Hoih Roek Gaiq Daengx Guek Haj Baez、Aen Hoih Cwnghez Roek Gaiq Haj Baez. Ndwen 3 ngoenz 24 banhaet, Aen Hoih Roek Gaiq Daengx Guek Haj Baez ciuhai aen hoih yawhbienh;banringzgvaq, Aen Hoih Cwnghez Roek Gaiq Haj Baez haimuq. Ngoenzneix, de caeuq geij boux doengzsaeh gungh boqhoiz fanh lai cih saw. Ngoenz daihngeih banringzgvaq, Aen Hoih Roek Gaiq Daengx Guek Haj Baez cingqsik haimuq. Ngamq song diemj lai cung, gyoengqde couh boqhoiz le hong baugau cwngfuj song fanh seiq cien lai cih saw. Daj ndwen 3 ngoenz 24 daengz ndwen 4 ngoenz 11 cib geij ngoenz ndawde, Vangz Haijveih gungh boqhoiz 25 fanh cih saw. Gij hong neix, mauhgvaq hong baeznaengz de 10 boix doxhwnj. Ca mbouj geijlai 20 ngoenz laebdaeb guhhong, mwh hai hoih le, de gaenq baeg yaek dai bae. Bi 2017 ndwen 3, de camgya aen hozdung bauqlwnh Baekging daengx guek “song hoih” daengx meizdij lai cungj vah Guengjsae Yinzminz Gvangjbo Dendaiz haenx. Aenvih miz le gij gingniemh camgya guhhong doengz sing fanhoiz hoihhung youqgaenj daengx guek, baezneix de baenzlawz naemj baenzlawz guh, ndaej caetliengh sang、yauqlig sang bae guh hong liux, ndaej daengz bouxdaeuz swcigih haenh.

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部