当前位置: Sawcuengh > saehmoq

Fouxdwklongj: Duj “Valengj” Yisuz Bouxcuengh Daegsaek Yienhda Ndeu

2018年01月03日    来源:广西民族报网    字号:[    ]

扁担舞:极具民族特色的壮族艺术“奇葩”

□ Liuz Yangz Dwng Cangj

Vunz bak diuq fouxdwklongj nauhyied raeuh.

Mehmbwk Bouxcuengh Nazmbaeklae Lungzciz diuq fouxdwklongj.

Faexhanz vang roq daengj dog foux ndei yawj.

Fouxdwklongj cunzbyaij yiengh yinx vunz.

Bang dahniq neix ndaej ciepban fouxdwklongj lo.

Fouxdwklongj baijyiengh va hai angj.

Doih fouxdwklongj Gyahfangh Majsanh Yen guh biujyienj.

Fouxdwklongj seiqseiz youq gingjgih biujyienj.

Fouxdwklongj ciuhgeq Majsanh.

  Youq gij mbanj Majsanh、Duh’anh doengh dieg Bouxcuengh neix, moix bi ndwencieng, gwnz diegdangz, gyaeujmbanj honghgai, dauqcawq cungj dingqnyi gij sing roqdog faexhanz, riengz sing gyonglaz lij cab miz gij sing hemq “haixhaix” fat okdaeuj, gij sing dikdok de rengzrwd haenqrem, singyiengj sepset goksad, nauhyied dangqmaz. Daegbied dwg doengxhaemh, dauqcawq ronghcangcang, aenmbanj gyukox, sing faexhanz cab gij sing mbokcuk mbaeumbengq sekrwz buenx roq haenx、gij sing riu gyoengq mbauqsau、gij sing haenh gyoengq bajlungz, gyoeb baenz gij sing angqyangz vuenyungz, gyuem doh aenmbanj, haprwenz luegbya, hawj vunz cingsaenz saenqhwnj, sim’angq simsangj. Gijneix couh dwg yiengh hoenghhwd fouxdwklongj beixnuengx Bouxcuengh raeuz haengjgyaez、Guengjsae okmingz haenx. Bi 2008, “fouxdwklongj Bouxcuengh” ndaej lied haeux Guengjsae buek daih- ngeih feihvuzciz vwnzva yizcanj mingzloeg.

  Fouxdwklongj caemh heuhguh “dwklongjleh”“guhlongj”“dwklongj”, dwg cungj foux ciuhnduj gag guh’angq youq ndawbiengz Bouxcuengh riuzcienz baenz cien bi ndeu, dwg vunz ciuhnduj Bouxcuengh daj ndaw guhhong daemhaeux bienbaenz “fouxdaemhaeux” daeuj guh’angq, doeklaeng bienqbaenz cungj foux aeu faexhanz roqdog daengqraez ndeu, itbuen dwg youz mehmbwk biujyienj, gyoengqde song fwngz gaem faexhanz, humx ndwn song henz daengqraez, ciuq gij diemjgyong bouxroqgyong roq haenx, yungh song gyaeuj faexhanz yinzrwd dwk roqdog daengqraez, caemhcaiq ei gij yienghdoengh ngoenznaengz guhhong yaep he gwnzlaj doxroq, yaep he ndwn hwnj maeuq roengz, yaep he diemdin caez byaij, yaep he baenq ndang diuqyat, youq ndaw roqdog hwnjhwnj roengzroengz, camca caezcingj haenx, dauqyienh gij yiengh guhhong caeuq simcingz angqyangz ndaemnaz、gvejhaeux、fadhaeux、gonhraemx、daemhaeux、daemjrok、laeh vaiz roengz naz haenx, doq roq doq ciengq doq foux, ciengzmienh hungloet nauhyied.

  Fouxdwklongj youq Duh’anh Linzgyangh、Disuh、Anhyangz daengj yanghcin caeuq Majsanh Bwzsanh、Gujcai、Gyahfangh daengj yanghcin riuzcienz ndaej hwng raeuh, moix bi ndawcieng coit daengz cibloeg ceiq hoengh, mbanjmbanj cungj diuq fouxdwklongj, hoeng gvaq cibloeg le couh mbouj diuq lo, neix dakdaiq le vunzlai Mbanjcuengh gij maqmuengh ndaw bi moq rumz swnh fwn yinz、haeux ndaej fungsou、dajciengx baenz raeuh、vunzvunz ndangrengz daengj. Fouxdwklongj codaeuz dwg aeu gep benjfaex ndeu goemq gwnz rumrin daemhaeux aeu faexhanz roqdog, gvaqlaeng aenvih rumrin naek lai senjnod mbouj bienh, menhmenh couh gaij baenz aeu daengqraez daeuj dingj. Diuq fouxdwklongj seiz, vunzsoq cix mbouj hanh, hoeng itdingh aeu dwg soqsueng, bouxyienj moix vunz cungj gaem diuz faexhanz ndeu, doiqnaj ndwn youq song mbiengj daengqraez, riengz sing gyong roqdog diuqyek, saek yaep daengj faexhanz doxroq, saek yaep vang faexhanz aeu song gyaeuj roq gwnz daengqraez; mizseiz doiqnaj song vunz doxroq, mizseiz youh baenq ndang caeuq boux raeblaeng doxroq, mizseiz lij seiq vunz camca mbat faexhanz doxroq. Diemj roqdog lai cungj lai yiengh, miz ndwn、maeuq、yamqgung、baenqndang daengj lai cungj fap roqdog, bienqvaq lai cungj, hwnjroengz caezcup, roqdog vaiqvit comzgaenj, yiengh- doengh rengzrwd, yienghfoux swhyienz sangj da. Mbangj dieg aeu faexsaux lawhdingj faexhanz, song gyaeuj lij cug hot geiq aen leij, roqdog hwnjdaeuj gij sing byotbet, ndeidingq dangqmaz.

  Youq diuq fouxdwklongj ndawde conroix miz dauq biujyienj caezcup ndeu, cujyau miz dwkaenrum、hoh fungsou、caez doxrop、daengx ranz angq、gonhraemx、ndaemnaz、fadhaeux daengj, yienh’ok gij yiengh guhhong、angqyangz beixnuengx Bouxcuengh. Aenvih fouxdwklongj mboujdan ndaej hawj vunzlai ndangrengz, caiqlij youq mwh biujyienj, engq aeu bouxyienj yamqdin dox- doengz, roqdog yinzrwd, byaij daengx caezcup, cix ndaej ungganq gij cingsaenz doxdaengh vunzlai, ndigah ndaej daengz beixnuengx Boux- cuengh angqcoux caeuq haengjgyaez.

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部