当前位置: Sawcuengh > saehmoq

Heiqgoengsae Bouxcuengh: Vwnzva Cienzdoengj Daegsaek Bouxcuengh Minghhoengh Yinxvunz

Heiqgoengsae Bouxcuengh dwg cungj citheiq cijdan Bouxcuengh miz ndeu, lizsij gyaenanz yienghdoengh yienghvah diuqfoux lai cungj lai yiengh, daegsaek minzcuz naekgywg, dwg aen bouhfaenh gyoebbaenz diuqfoux ndawbiengz Bouxcuengh. Beixnuengx Bouxcuengh moix baez roebbungz ngoenzciet ngoenz angqhoh

2018年01月10日    来源:广西民族报网    字号:[    ]

壮族特色传统文化:魅力“壮师剧”

□ Leix Hoengz

Ngoenzneix ndaw mbanj yienj Heiqsaecuengh.

Heiqsaecuengh Sanglinz yienj ndaej naemqnini.

Vunzmbanj Gingloz Vujmingz angq diuq Heiqsaecuengh.

Heiqgoengsae Bouxcuengh dwg cungj citheiq cijdan Bouxcuengh miz ndeu, lizsij gyaenanz yienghdoengh yienghvah diuqfoux lai cungj lai yiengh, daegsaek minzcuz naekgywg, dwg aen bouhfaenh gyoebbaenz diuqfoux ndawbiengz Bouxcuengh. Beixnuengx Bouxcuengh moix baez roebbungz ngoenzciet ngoenz angqhoh, cungj gyaez cingj goengsae (canghheiq) yienj heiqgoengsae, gij neiyungz citheiq yienjok de cawz miz gij citheiq cienzdoengj le, lij gag bien gag yienj gij citheiq lwnhgangj gij guhhong gvaq saedceij ngoenznaengz vunzlai sugsed gyaez yawj haengj dingq haenx, ndaej daengz vunzlai haengjgyaez. Bi 2007, heiqgoengsae Bouxcuengh ndaej lied haeuj Cung- guek feihvuzciz vwnzva yizcanj mingzloeg.

  Heiqgoengsae Bouxcuengh caemh heuhguh Heiqsaecuengh roxnaeuz Citheiqsaecuengh, dwg cungj diuqfoux cuengqcaeq gvihaeuj gyaubaij Meizsanh ndeu, bi 1987 Swcigih cingqsik ancoh guh “Citheiq-saecuengh”. Cungj yizsi cuengqcaeq neix gak dieg heuhfap mbouj doengz, miz “dwkcaemj”“guhcai”“guhsae”“diuqsae”“ciengqsae” doenghgij heuhfap neix, goekgaen de dwg daj ciengzdauh guhfap ndawbiengz Bouxcuengh ciuhgeq daeuj, hainduj dwg yizsi cuengqcaeq ciuhnduj vih mbaenj rumz swnh fwn yinz、dajndaem dajciengx fungsou、ranzvunz ndangcangq swnhleih vunz Bouxcuengh youq ndaw guhhong gvaq saedceij cauh okdaeuj haenx, dwg cungj yienghsik diuqfoux youq Ciuhcingh seiz Yunghcwng、Genzlungz ndaej daj boux goengsae ndeu ciengq gojgaeq hwngfat daengz lai giek ciengq gojgaeq daengz fouxmauhngeg, riengzlaeng couh hainduj faengiek yienj gojgaeq ndeu, doengciengz youq ngoenzciet caeuq miz hozdung cuengqcaeq seiz biujyienj, youq Namzningz Si Vujmingz、Yunghningz、Sanglinz、Majsanh, Laizbinh Si Hinghbinh、Vujsenh、Siengcouh, Hozciz Si Duh’anh、Yizcouh、Vanzgyangh daengj gih si yienh caeuq Gveigangj Si、Ginhcouh Si mbangj dieg riuzcienz ndaej haemq hwng, daengz seizneix gaenq miz 573 bi lizsij, seizneix youq Laizbinh Si、Nanzningz Si doenghgij mbanj Bouxcuengh comzyouq haenx, ca mbouj geijlai mbanjmbanj miz ban Heiqsaecuengh roxnaeuz bouxyienj Heiqsaecuengh.

  Aenvih dieg Bouxcuengh comzyouq haenx ginghci vwnzva hwngfat mbouj doxdaengh, fungsug sibgvenq caeuq yawjfap yinxdaeuz mbouj doxdoengz, gij hingzsik biujyienj、daegdiemj funggek caeuq neiyungz yienjciengq heiqgoengsae gak dieg caemh mbouj doengz geijlai. Itbuen daeuj gangj gij funggek Heiqgoengsae dwg funggek sohsed ciuhgeq, yienghdoengh onjcaem rengzrwd, bouxyienj aeu guhdaengz yamqgung aeu daemq、ndang aeu bibuengq、caekhaex aeu niuj、gyaeujhoq aeu saenz; mwh diuqfoux ciengzseiz youq mwh diemjgyong roq ndaej deihgaenj haenqhwd haenx sawqmwh byoqheiq gungq gyaeujhoq, ndangdaej riengz dwk fanfoek bibuengq, yienghdoengh diuzga lai cungj lai yiengh, gawq miz daegdiemj, youh dawzyinx dangqmaz. Heiqgoengsae cungj aeu gyongrwi、gyongbej、laz、cemq doenghgij yozgi ndaekroq neix buenx foux; ndawde gij heiqgoengsae riuzcienz youq ranghdieg Vujmingz、Sanglinz、Vujsenh、Ginhcouh daengj dieg haenx daiqbiujsingq haemq yienhda.

  Heiqgoengsae aeu gij yaemwenq fwen caeuq gizbaiz Bouxcuengh guh goekdaej, gvangqlangh supaeu gij goj ndawbiengz、gojriuz Bouxcuengh hawj de neiyungz lai cungj lai yiengh, yungh cungj hingzsik Fwencuengh lwnhgoj, gangjbeg gig noix, doq ciengq doq foux, aeu ciengq guhcawj, hingzsik biujyienj caemh mbouj miz dingh; ciuq doiq Vujmingz daengj cibgeij aen gih si yienh haenx loq gyoepsuenq baez ndeu, gungh miz 《Fouxsamyuenz》《Foux Moz It Daihvuengz》《Fouxlauzgungq》《Hoenx Seiq Sai》《Fouxgyongrwi》doenghgij citheiq neix baenz it bak lai diuz. Riengzdwk citheiq yienjok lai, “vunz saenz” beijlaeh bienqvaq, mauhngeg ciemhciemh aeu vehcang daeuj dingjlawh, fouxgoengsae caemh bienqbaenz le cungj citheiq ndeu—Heiqsaecuengh, de caeuq Heiq- cuengh caemhcaez, baenz le song duj va’mbu caemh gaenqva ndeu gyaeundei yienhda.

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部