当前位置: Sawcuengh > saehmoq

Fouxnyenz Yauzcuz Denzlinz:Duj Va’ndoeng Gyaeundei Youq Ndaw Suenva Yisuz Vwnzva Cungguek Angjhai

2018年04月04日    来源:广西民族报网    字号:[    ]

田林瑶族铜鼓舞:美丽的山花在中国文化艺术百花园中绽放

□ Gwzbingz Bwzhaij

Gyoengqnyez Yauzcuz ndaw mbanj angqyangz coux hek.

Caeq nyenz yizsi niemh goengcoj.

Gyoengq vunzmbanj riengz sing gyong diuq fouxnyenz.

  Moix bi ndwencieng, Denzlinz Yen Lucwngz Yauzcuz Yangh Sanhyauz Cunh cungj vunz lai vunz daih, sing gyonglaz gyukgyad, nauhyied raixcaix, caenh raen gyoengq beixnuengx Yauzcuz cingq gaem saihwet lai saek vad gyaepbangx hopheux aennyenz gyongfaex angqyangz diuqfoux, banh gij hozdung vwnzva fungsug ndawbiengz fouxnyenz Yauzcuz bi gvaq mbat haenx, caemh miz haujlai vunzhek humx youq seiqhenz yawj nauhyied, daengx mbanj angqyangz hoenghhwd.

  Fouxnyenz Yauzcuz dwg cungj hingzsik diuqfoux ndawbiengz beixnuengx Yauzcuz Denzlinz cauh ndeu, youq ranghdieg Lucwngz Yauzcuz Yangh caeuq Bingzsanh Yangh doenghdieg neix riuzcienz, daengz seizneix gaenq miz song bak lai bi lizsij, dwg suenva yisuz vwnzva guekcoj ndawde duj va’ndoeng gyaeundei ndeu. Aennyenz dwg doxgaiq dijbauj cojcoeng Yauzcuz Denzlinz senjdieg youq raekdaiq ndeu, itcig ndaej yawj guh saenzlingz. Moix bi ndwencieng co’ngeih daengz ndwenngeih congeih, daengx mbanj vunz cungj gag doxcomz hwnjdaeuj angq diuq foux gyong nyenz, lauxnyaeq saimbwk fwngz vad din diuq sim angqyangz, sing gyong naemqhaenq haprwenz, aeu neix daeuj angqhoh ngoenzciet, geiqniemh goengcoj, mbaenjgouz ndangrengz souhyienz、dajciengx maj vaiq、haeuxgwn fungsou. Bi 2008, fouxnyenz Denzlinz ndaej lied haeuj guekgya gaep feihvuzciz vwnzva yizcanj mingzloeg.

  Fouxnyenz Yauzcuz cujyau miz aeu nyenz、caeq nyenz、roq nyenz、haem nyenz seiq hangh neiyungz. Ngoenz haenx, daengx mbanj lauxnyaeq saimbwk cungj cangndang moqsup ronghlwenq, youz goenglaux ndaw coengcug cujciz, guh aen yizsi “aeu bauj” bi guh mbat ndeu haenx, dawz song aen nyenz aen goeng aen buz haenx vat okdaeuj, baij hwnj daizyieng, aeu doxgaiq dajcuengq. Caeq nyenz sat le, goenglaux heuh bouxcoz ndaw mbanj dawz sam aen gyong venj hwnjdaeuj, youz goenglaux sien roq gvaqbae lwnz ndeu, riengzlaeng vunzlai cij doxlwnz bae roq. Roq gyong hainduj seiz, gij doengh numqmenh unqnemq, cugciemh gyavaiq, sing gyong sanghaenq naemqrwd, doeklaeng lumj ok rumz hung doek fwn raq. Song boux roq gyongnaeng’vaiz haenx dwg bouxlingxfoux, gyoengqde doq roq doq foux, saekseiz naj doiq roq, saekseiz baenq ndang roq, gaiqcuizroq mbouj dingz mbouj duenh dwk daj laenggyaeuj、laenghwet、lajeiq iet okbae, youq gwnz naenggyong doxlwnz roqdaem, banj roq sienmingz, gij doengh doxdaengh, ciepswnj redfwd. Doengzseiz, loxlez raez、loxlez、aendig、gyongbenj、laz、nauzcemq cungj caez yiengj hwnjdaeuj buenxfoux. Seizneix, gyoengq lauxnyaeq saimbwk caemh fwngz vad saihwet lai saek、gyongx diuzgaeu roxnaeuz gyaepbangx, hophumx gyong’venj diuqfoux hwnjdaeuj, ciengzmienh hoenghhwd, gyukgyad nauhyied. Sien diuq 《Foux Gvaengxluenz》, riengzlaeng doxrangh diuq hwnj《Foux Couxcin》《Foux Dwklongj》《Foux Fungsou》. Diuqfoux funggek daegbied gag miz, yienghfoux ndeiyawj, rengzhoengh yinxvunz, hawj vunz sim’angq simsangj, boux- yawj cungj dopfwngz haenhndei.

  Moix bi diuq fouxnyenz sat le, youh dawz aennyenz haem roengz lajnamh bae, dieghaem cij miz geij boux vunz rox.

  Doenghbi neix daeuj, Denzlinz Yen gak gaep cwngfuj caeuq mizgven bumwnz cungj haenqrengz bae guh ndei gij hong swnjcienz、 hoengzyiengz fouxnyenz hangh vwnzva yizcanj neix, bangcoengh lajmbanj vwnzyi duenzdaej hag diuq、biujyienj fouxnyenz, youq ndawhag siujyoz banh ban fouxnyenz lwgnyez. Fouxnyenz Yauzcuz caemh youq daengx guek doxdax ndawde ndaej ciengj haujlai baez, hawj duj va- ndoeng daegbied neix hai ndaej engq ronghlwenq angjda.

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部