当前位置: Sawcuengh > saehmoq

Swcigih Minzyijveij Cawjbanh Lanzmoeg 《Hagdangz Gvangjbo Sawcuengh Vahcuengh》 Guh Gaijbanj

2018年06月14日    来源:广西民族报网    字号:[    ]

自治区民语委主办栏目《壮语文广播学校》迎来全新改版

  Vih hab’wngq cangzdai moq bienqvaq moq, ndaej hawj vunzlai habhoz gij aeuyungh ndwenngoenz cingsaenz vwnzva lai cungj lai yiengh haenx, laebdaeb fatok 《Hagdangz Gvangjbo Sawcuengh Vahcuengh》 gij cozyung dieg youqgaenj youq ndaw hong doigvangq yungh senhconz Sawcuengh Vahcuengh, bineix gyaeujbi, Swcigih Minzyijveij haenqrengz maeuzveh gij saeh cezmuz gaijbanj, ginggvaq caeuq Guengjsae Yinzminz Gvangjbo Dendaiz doxyaeng, song mbiengj doxdoeng doxrox; ciuqei gvangjbo meizgai cienzboq gvilwd, giethab gij daegdiemj doigvangq yungh Sawcuengh Vahcuengh, ei gij fuengsik ciepsou saenqsik vunz daihneix, yungh gij hingzsik gawq gienzvi yiemzmaed, youh dawz son’gyauq caeuq guh’angq doxyungz guh itheij, caenh’itbouh gya’gvangq gij rengzyingjyangj cezmuz, gyalai gij ligdoh senhconz doigvangq Sawcuengh Vahcuengh, caux ok gij heiqfaenh daengx aenbiengz hag、haeujcoengh、swnjcienz Sawcuengh Vahcuengh.

  Youq song mbiengj caez roengzrengz ca mbouj lai buenq bi, 《Hagdangz Gvangjbo Sawcuengh Vahcuengh》 gaijbanj le youq ndwen 6 ngoenz 1 youq Guengjsae Yinzminz Gvangjbo Dendaiz Sinhvwnz 910 binzdau cingqsik boqok.

  Ciuq cam rox, 《Hagdangz Gvangjbo Sawcuengh Vahcuengh》 gaijbanj le, gungh laeb “ngoenz ndeu dangz ndeu”“Vahcuengh dingq lajmbwn”“Vahcuengh hai gangj lo”“vih mwngz doeg sei(banj Vahcuengh)”“cwngcwz ngoenzngoenz doeg”“dingq go Mbanjcuengh gyaeundei” 6 aen banjgvaij iq, cujyau gangj gij giekdaej cihsiz Sawcuengh Vahcuengh、gveihfan swz coenz, senhconz minzcuz cwngcwz, boqbauq seizseiz sinhvwnz, langhbaij minzcuz vwnzyoz、ciengqgo yisuz caeuq fungsug sibgvenq daengj. Gaijbanj le cezmuz neiyungz engq fungfouq, hingzsik engq lai yiengh, engq ndaej hab’wngq bouxdingq daihneix sou ndaej saenqsik, youq mwh soudingq hagsib gij daegdiemj cihsiz Sawcuengh Vahcuengh.(Ouh Caijfangh)

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部