当前位置: Sawcuengh > saehmoq

Aen Diuzlaeh Hong Vahsaw Siujsoq Minzcuz Gvangjsih Bouxcuengh Swcigih

2018年08月03日    来源:广西民族报网    字号:[    ]

AEN GOENGGAUQ GVANGJSIH BOUXCUENGH SWCIGIH YINZDA CANGZVEIJVEI

(Gaiq Cibsam Hauh Daih 4)

  《Aen Diuzlaeh Hong Vahsaw Siujsoq Minzcuz Gvangjsih Bouxcuengh Swcigih》gaenq youz Gvangjsih Bouxcuengh Swcigih Gaiq Cibsam Yinzminz Daibyauj Davei Cangzvu Veijyenzvei Baez Hoih Daihsam youq 2018 nienz 5 nyied 31 hauh doenggvaq, seizneix goengbouh, daj 2018 nienz 8 nyied 1 hauh hwnj saedhengz.

Gvangjsih Bouxcuengh Swcigih Yinzminz Daibyauj Davei Cangzvu Veijyenzvei

  2018 nienz 5 nyied 31 hauh

  AEN DIUZLAEH HONG VAHSAW SIUJSOQ MINZ CUZ GVANGJSIH BOUXCUENGH SWCIGIH

广西壮族自治区少数民族语文工作条例

  (2018 nienz 5 nyied 31 hauh Gvangjsih Bouxcuengh Swcigih Gaiq Cibsam Yinzminz Daibyauj Davei Cangzvu Veijyenzvei Baez Hoih Daihsam doenggvaq)

  Moegloeg

  Cieng Daih’it Cungjcwz

  Cieng Daihngeih Hagsib Caeuq Sawjyungh

  Cieng Daihsam Yenzgiu Caeuq Baujhoh

  Cieng Daihseiq Faplwd Cwzyin

  Cieng Daihhaj Fucwz

  Cieng Daih’it Cungjcwz

  Diuz daih’it Vih gyagiengz hong vahsaw siujsoq minzcuz, baujcang gak siujsoq minzcuz ndaej swyouz sawjyungh caeuq hwngfat vahsaw bonj minzcuz, gohyoz baujhoh caeuq hwngfat vahsaw siujsoq minz- cuz, doidoengh gak minzcuz vwnzva doengzcaez mwnhoengh, coicaenh minzcuz doxgiet baenaj, gaengawq《Aen Fap Gagguenj Dieg Minzcuz Cunghvaz Yinzminz Gunghozgoz》《Aen Fap Vahsaw Guekgya Doeng- yungh Cunghvaz Yinzminz Gung- hozgoz》daengj faplwd、hingzcwng fapgvi, giethab gij saedcaeq swcigih raeuz, ceiqdingh aen diuzlaeh neix.

  Diuz daihngeih Hagsib sawjyungh、yenzgiu baujhoh gak cungj vahsaw siujsoq minzcuz caeuq guenjleix vueddoengh ndaw ranghdieg hingzcwng bonj swcigih habyungh aen diuzlaeh neix.

  Diuz daihsam Hong vahsaw siujsoq minzcuz wngdang genhciz gij yenzcwz ciuq saedsaeh guh、faenloih dazyinx、gaenxmaenx onjdangq、gohyoz baujhoh、ciuqfap guenjleix, aeueiq gij eiqnyienh gak minzcuz bingzdaengj yungh vahsaw caeuq gij gvilwd vahsaw hwngfat.

  Diuz daihseiq Swcigih youq gwnz giekdaej doengjit doigvangq caeuq sawjyungh vahsaw guekgya doengyungh, gujli caeuq haeujcoengh youq dieg Bouxcuengh comzyouq yungh gij vahsaw Bouxcuengh youz《Fueng’anq Sawcuengh》 doekdingh ndaej guekgya baecinj haenx.

  Sawjyungh gij vahsaw Bouxcuengh 《Fueng’anq Sawcuengh》doekdingh, mbouj gaz daengz gak dieg yungh Vahcuengh bonjdieg caeuq vahsaw siujsoq minzcuz wnq dangdieg.

  Diuz daihhaj Aen yinzminz cwngfuj yienh gaep doxhwnj wngdang nab hong vahsaw siujsoq minzcuz haeuj ndaw gveihva gozminz ginghci caeuq sevei hwngfat, lied gij cienz hong vahsaw siujsoq minzcuz haeuj ndaw yawhsuenq bonjgaep, laebhwnj aen gihci cwngfuj cingjdaej suenqveh habdangq、cawjguenj bouhmonz fucwz、mizgven bouhmonz boiqhab、sevei gak gyaiq caeuqfaenh gij hong vahsaw siujsoq minzcuz, gyagiengz dazyinx caeuq guenjleix hong vahsaw siujsoq minzcuz.

  Diuz daihroek Aen bouhmonz cawjguenj hong vahsaw siujsoq minzcuz yinzminz cwngfuj yienh gaep doxhwnj fucwz guenjleix caeuq gamduk gij hong vahsaw siujsoq minzcuz ndaw ranghdieg hingzcwng bonjfaenh.

  Doenghgij bouhmonz yinzminz cwngfuj yienh gaep doxhwnj lumjbaenz minzcuz、gyauyuz、vwnzva、sinhvwnz okbanj gvangjden wngdang youq ndaw gvaengxlaengx cizcwz bonjfaenh guh ndei hong vahsaw siujsoq minzcuz.

  Cieng Daihngeih Hagsib Caeuq Sawjyungh

  Diuz daihcaet Gak gaep yinzminz cwngfuj gujli caeuq haeujcoengh youq dieg siujsoq minzcuz comzyouq sawjyungh vahsaw siujsoq minzcuz, coicaenh cienzboq caeuq wngqyungh vahsaw siujsoq minzcuz, doicaenh vahsaw guekgya doengyungh caeuq vahsaw siujsoq minzcuz doxhuz hwngfat.

  Diuz daihbet Swcigih aen bouhmonz cawjguenj hong vahsaw siujsoq minzcuz wngdang caeuq doenghgij bouhmonz minzcuz、gyauyuz、vwnzva、gunghyez nem sinsizva daengj gyagiengz guh gveihfanva、byauhcunjva、sinsizva vahsaw siujsoq minzcuz, laeb caezcienz aen dijhi gveihfan byauhcunj vahsaw siujsoq minzcuz, ceiqdingh gij byauhcunj giekdaej gveihfan vahsaw siujsoq minzcuz sevei wngqyungh caeuq sinsizva gaenjyungh, laeb aen cidu saemjdingh fatbouh gij swzmoq suzyij vahsaw siujsoq minzcuz.

  Diuz daihgouj Gak gaep yinzminz cwngfuj gujli caeuq haeujcoengh doengh aen youwzyenz、cunghsiujyoz dieg siujsoq minzcuz comzyouq miz diuzgienh roxnaeuz aen youwzyenz、cunghsiujyoz hagseng siujsoq minzcuz haemq lai haenx aeu vahsaw guekgya doengyungh caeuq vahsaw siujsoq minzcuz song vahsaw sonhag.

  Diuz daihcib Gujli caeuq haeujcoengh doengh aen gauhdwngj yenyau minzcuz、swhfan daengj miz diuzgienh haenx, ndalaeb gij ciennieb caeuq gocwngz yungh daengz vahsaw siujsoq minzcuz, lumjbaenz vwnzyoz、gyauyuz、yisuz、fanhoiz、gvangjbo yingjsi, gauhdwngj yenyau wnq miz diuzgienh ndaej hailaeb gij ciennieb caeuq gocwngz gvendaengz vwnzyoz vahsaw siujsoq minzcuz.

  Diuz cib’it Swcigih yinzminz cwngfuj aen bouhmonz cawjguenj gyauyuz wngdang ceiqdingh aen gveihva gungganq lauxsae song vahsaw rox vahsaw guekgya doengyungh caeuq vahsaw siujsoq minzcuz, laeb aen doih lauxsae song vahsaw cungj rox、yozgoh boiqdauq、hab’wngq yienhdaih son’gyauq aeumiz.

  Diuz cibngeih Aen yinzminz cwngfuj dieg siujsoq minzcuz comzyouq dizcang caeuq gujli gak minzcuz ganbu doxhag vahsaw, vih doengzseiz yungh vahsaw guekgya doengyungh caeuq vahsaw siujsoq minzcuz caephengz goengsaeh cauh’ok diuzgienh.

  Gij bouhmonz cawjguenj hong vahsaw siujsoq minzcuz nem doenghgij bouhmonz aen yinzminz cwngfuj dieg siujsoq minzcuz comzyouq, lumj- baenz minzcuz、gyauyuz、yinzliz swhyenz caeuq sevei baujcang daengj, wngdang nab ganbu hagsib vahsaw guekgya doengyungh caeuq vahsaw siujsoq minzcuz song vahsaw haeuj ndaw gveihva hong bouhmonz bonjfaenh, doiq gyoengq ganbu youq aen gangjvei aeu miz vahsaw guekgya doengyungh caeuq vahsaw siujsoq minzcuz song vahsaw naengzlig neix guh ndei gungganq.

  Diuz cibsam Miz gij cingzhingz lajneix yiengh ndeu, wngdang doengzseiz yungh Sawgun gveihfan caeuq gij Sawcuengh youz 《Fueng’anq Sawcuengh》doekdingh ndaej guekgya baecinj haenx:

  (It) Aenyaenq、baizbenj gozgyah gihgvanh、swyez danhvei、yinzminz donzdij;

  (Ngeih) Gij mingzcoh cwngvu vangjcan、cwngbau swcigih yinzminz cwngfuj;

  (Sam) Gij mingzcoh cwngvu vangjcan、cwngbau yinzminz cwngfuj aen si laeb gih、yienh (si、gih) dieg Bouxcuengh comzyouq;

  (Seiq) Gij cingzhingz wnq faplwd、fapgvi gvidingh.

  Youq ndaw ranghdieg hingzcwng swciyen、aen yienh yiengjsouh swciyen dakdaih、minzcuzyangh miz gij cingzhingz gvanj gonq, ndaej doengz- seiz yungh cihsaw siujsoq minzcuz cawjdaej dangdieg.

  Diuz cibseiq Goengminz siujsoq minzcuz cungj miz gij gienzleih yungh vahsaw bonj minzcuz daeuj guh dajgauq. Yinzminz fazyen、yinzminz genjcazyen youq dieg siujsoq minzcuz comzyouq roxnaeuz lai minzcuz caemh youq, wngdang yungh gij vah dangdieg doengyungh daeuj saemjleix caeuq genjcaz anqgienh. Doiq boux caeuqfaenh dajgauq mbouj rox vahsaw dangdieg doengyungh, wngdang bang de fanhoiz. Yinzminz fazyen、yinzminz genjcazyen wngdang gaengawq saedcaeq aeumiz, youq ndaw faenzsaw faplwd yungh cungj ndeu roxnaeuz geij cungj cihsaw dangdieg doeng- yungh.

  Diuz cibhaj Ceksaw sonhag、gvangjbo yingjsi、dozsaw bauganh、vangjloz、vwnzyi biujyienj、goenggungh fugsaeh daengj yungh vahsaw siujsoq minzcuz seiz, wngdang yungh gij vahsaw siujsoq minzcuz gveihfan.

  Diuz cibroek Sojmiz danhvei caeuq bouxvunz cungj mbouj ndaej miz gij hingzveiz lajneix gaz daengz hagsib roxnaeuz sawjyungh vahsaw siujsoq minzcuz:

  (It) Luenh gaij、gyangqdaemq vahsaw siujsoq minzcuz;

  (Ngeih) Lanz bouxwnq hagsib roxnaeuz sawjyungh vahsaw siujsoq minzcuz.

  Diuz cibcaet Doengh aen goenggungh fugsaeh gihgou lumjbaenz gyaudoeng daehyinh、veiswngh giswngh、gunghsangh、yinzliz swhyenz caeuq sevei baujcang、suivu、gunghanh、swhfaz hingzcwng、youzcwng、dunghsin、ginhyungz daengj wngdang gaengawq saedcaeq aeumiz, daezhawj vahsaw guekgya doengyungh caeuq vahsaw siujsoq minzcuz song vahsaw fugsaeh.

  Diuz cibbet Gak gaep yinzminz cwngfuj wngdang giethab gij vueddoengh minzcuz cienzdoengj vwnzva yungh vahsaw siujsoq minzcuz. Mwh cujciz guh gij vueddoengh angqhoh ngoenzciet hungnaek caeuq vwnzva dijyuz siujsoq minzcuz, wngdang doengzseiz yungh vahsaw guekgya doengyungh caeuq vahsaw siujsoq minzcuz, gujli guekgya gunghcoz yinzyenz youq ndaw vueddoengh hungnaek dieg siujsoq minzcuz comzyouq yungh gij vahsaw siujsoq minzcuz cawjdaej dangdieg daeuj cujciz vueddoengh caeuq fatbiuj gangjvah.

  Diuz cibgouj Gak gaep yinzminz cwngfuj gujli caeuq haeujcoengh yungh vahsaw siujsoq minzcuz daeuj bienhoiz、okbanj gak loih dozsaw、yaemsiengq ceiqbinj, haeujcoengh gvangjbo dendaiz、densidaiz、vangjloz meizdij hailaeb binzliz、binzdau roxnaeuz ciendaez cietmoeg、lanzmoeg vahsaw siujsoq minzcuz, demlai vahcungj boqok caeuq neiyungz、seizgan boqok, gujli caeuq haeujcoengh yungh vahsaw siujsoq minzcuz daeuj ingj、cauh、hoiz、cuengq denyingj densigi.

  Diuz ngeihcib Dieg siujsoq minzcuz comzyouq ciuloeg gungh- vuyenz、swyez danhvei ciu vunz seiz, gaengawq gangjvei caeuq cizvei soqliengh aeumiz, louz ok itdingh cizvei ciuloeg gij gaujseng sug rox vahsaw guekgya doengyungh caeuq vahsaw siujsoq minzcuz.

  Dieg siujsoq minzcuz comzyouq ciuloeg gunghvuyenz、ciuyungh bouxvunz ciennieb gisuz seiz, wngdang louz ok mingzngeg caeuq gangjvei doxwngq, dinghyiengq genjyungh gij gaujseng sug rox vahsaw guekgya doengyungh caeuq vahsaw siujsoq minzcuz.

  Diuz ngeihcib it Miz gij cingzhingz lajneix yiengh ndeu, mwh bingz yungh ciennieb gisuz cizcwngh, cawz ok ciennieb gisuz suijbingz iugouz, doiq gizyawz diuzgienh habdangq cuengqgvangq:

  (It) Doengh boux ginggvaq vahsaw siujsoq minzcuz naengzlig rausawq habgek, sug rox vah roxnaeuz saw siujsoq minzcuz;

  (Ngeih) Doengh boux guh gij hong ciennieb gisuz lumjbaenz gohyenz、sonhag、sinhvwnz、okbanj、fanhoiz、gvangjbo、denyingj densi、cingjleix sawgeq、cawqleix saenqsik daengj vahsaw siujsoq minzcuz fuengmienh;

  (Sam) Doengh boux youq yienh (si、gih)、yangh (cin) ciengzgeiz guh gij hong hagsib yenzgiu、ciengjgouq baujhoh caeuq cienzswnj hwngfat vahsaw siujsoq minzcuz.

  Diuz ngeihcib ngeih Gujli caeuq bangfuz guh gij saehnieb cingjleix fanhoiz sawgeq siujsoq minzcuz, gyagiengz gij hong doxhoiz dozsaw、yingjsi cozbinj vahsaw guekgya doengyungh、vahsaw guekrog caeuq vahsaw siujsoq minzcuz.

  Vahsaw guekgya doengyungh caeuq vahsaw siujsoq minzcuz doxhoiz roxnaeuz cienjsij seiz, wngdang hab gij daegdiemj caeuq gvilwd vahsaw guekgya doengyungh caeuq vahsaw siujsoq minzcuz, gimq yungh gij vahsaw daiq miz yawjsiuj caeuq mbouj gingqcungh siujsoq minzcuz.

  Cieng Daihsam Yenzgiu Caeuq Baujhoh

  Diuz ngeihcib sam Gak gaep yinzminz cwngfuj wngdang ceiqdingh gij gveihva gungganq vunzcaiz vahsaw siujsoq minzcuz, gyagiengz laebndei caeuq guenjleix aen doih vunzcaiz hong vahsaw siujsoq minzcuz.

  Diuz ngeihcib seiq Aen yinzminz cwngfuj yienh gaep doxhwnj haeujcoengh gauhdwngj yenyau caeuq gohyenz gihgou guh vahsaw siujsoq minzcuz gohyoz yenzgiu, gujli boux guh hong vwnzyi yungh vahsaw siujsoq minzcuz daeuj guh vwnzyi cauhsij caeuq biujyienj, gungganq benhciz、gicej、cozgyah vahsaw siujsoq minzcuz.

  Yungh vahsaw siujsoq minzcuz daeuj cauhsij、fanhoiz、sonhag、saemjdingh daengj vueddoengh, bouxvunz soj ndaej cienzhong, ndaej camciuq mizgven gvidingh biucinj daj sang、daj lai caephengz.

  Diuz ngeihcib haj Aen yinzminz cwngfuj dieg siujsoq minzcuz comzyouq wngdang bangfuz haifat gij doxgaiq caeuq fugsaeh aeu vahsaw siujsoq minzcuz guh gaiqdak haenx, gujli caeuq haeujcoengh baujhoh gij minzcuz vwnzva yizcanj、guhciengz- guenj caeuq haifat lijyouz daengj daiq miz vahsaw siujsoq minzcuz vwnzva yenzsu haenx, coicaenh baujhoh caeuq hwngfat siujsoq minzcuz cienzdoengj vwnzva.

  Diuz ngeihcib roek Gak gaep yinzminz cwngfuj wngdang gyagiengz laebguh swhliugu vahsaw siujsoq minzcuz, cujciz soucomz gij vah gak siujsoq minzcuz caeuq gij vahliuh deihfueng de, caemhcaiq guh gohyoz cingjleix、ciengzgeiz yocaeu、haifat leihyungh.

  Aen yinzminz cwngfuj yienh gaep doxhwnj wngdang gyagiengz gij hong ciengjgouq、baujhoh vahsaw yaek ciedraeg siujsoq minzcuz, cujciz ceiqdingh gij cosih baujhoh vahsaw yaek ciedraeg siujsoq minzcuz, diucaz、soucomz、yenzgiu、cingjleix、yocaeu gij swhliu vahsaw yaek ciedraeg siujsoq minzcuz.

  Diuz ngeihcib caet Gujli caeuq haeujcoengh sevei gak gyaiq yungh lai cungj fuengsik caeuqfaenh gij hong ciengjgouq、baujhoh、yenzgiu vahsaw siujsoq minzcuz.

  Cieng Daihseiq Faplwd Cwzyin

  Diuz ngeihcib bet Famh gij gvidingh diuz cibsam aen diuzlaeh neix, mbouj ciuq gvidingh doengzseiz yungh Sawgun gveihfan caeuq gij Sawcuengh youz 《Fueng’anq Sawcuengh》doekdingh ndaej guekgya baecinj haenx, youz aen bouhmonz cawjguenj hong vahsaw siujsoq minzcuz yinzminz cwngfuj yienh gaep doxhwnj roengz lingh gaijcingq; dingj mbouj gaijcingq, couh gingjgau de, caemhcaiq dukcoi de hanhgeiz gaijcingq.

  Diuz ngeihcib gouj Famh gij gvidingh diuz cibhaj aen diuzlaeh neix, mbouj gveihfan yungh vahsaw siujsoq minzcuz, youz aen bouhmonz cawjguenj hong vahsaw siujsoq minzcuz yinzminz cwngfuj yienh gaep doxhwnj roengz lingh gaijcingq; dingj mbouj gaijcingq, couh gingjgau de, caemhcaiq dukcoi de hanhgeiz gaijcingq.

  Diuz samcib Famh gij gvidingh diuz cibroek aen diuzlaeh neix, miz gij cingzhingz lajneix yiengh ndeu, youz aen bouhmonz cawjguenj hong vahsaw siujsoq minzcuz yinzminz cwngfuj yienh gaep doxhwnj roengz lingh hanhgeiz gaijcingq; gvaqgeiz mbouj gaijcingq, fadcienz haj bak maenz doxhwnj haj cien maenz doxroengz:

  (It) Luenh gaij、gyangqdaemq vahsaw siujsoq minzcuz;

  (Ngeih) Lanz bouxwnq hagsib roxnaeuz yungh vahsaw siujsoq minzcuz.

  Diuz samcib it Famh gij gvidingh aen diuzlaeh neix, mizgven bouhmonz caeuq bouxvunz guhhong de mbouj ciuqfap hengzguh cizcwz, fuengzngaih cingqciengz guh hong vahsaw siujsoq minzcuz, cauhbaenz hougoj mbouj ndei, youz cawjguenj bouhmonz gaepgwnz de、genhcaz gihgvanh roxnaeuz aen danhvei de roengz lingh gaijcingq; cingzciet naekhaenq, youz mizgven gihgvanh ciuqfap doiq bouxfucwz cawjguenj caeuq boux miz cwzyin cigsoh de guh hingzcwng cujfwnh; cauxbaenz famhcoih, ciuqfap cazdawz hingzsw cwzyin.

  Cieng Daihhaj Fucwz

  Diuz samcib ngeih Aen diuzlaeh neix daj 2018 nienz 8 nyied 1 hauh hwnj saedhengz.

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部