当前位置: Sawcuengh > saehmoq

Baksaek Gyauhgingj Senhconz Hwnghwnj “Heiq Minzcuz”

2018年09月14日    来源:广西民族报网    字号:[    ]

百色交安宣传掀起“民族风”

  “Hai ci mbouj gwn laeuj, naengh cimohdoz aeu daenj mauh’ancienz, lwgnyez caengz majhung gaej hai cimohdoz.” Mboengqneix, youq gwnz “ciet bogfeiz” Yizcuz Lungzlinz Gak Cuz Swciyen、Sihlinz Yen, gyauhgingj dangdieg yungh vah Yizcuz, yiengq gyoengq vunzlai daeuj camgya ngoenzciet hozdung haenx senhconz gyaudoeng ancienz cihsiz.

  Baksaek dwg dieg caemh miz vwnzva lai aen minzcuz aeu Bouxcuengh guhcawj he, ndaw gyaiq miz Cuengh、Yauz、Myauz、Yiz、Gwzlauj daengj vwnzva lai aen minzcuz hoenghvuengh, miz hawdanh Mbanjyauz Cauzlij Lingzyinz、cietdiuqbo Myauzcuz Lungzlinz、cietdiuqgung Yizcuz Nazboh daengj hozdung angqhoh ngoenzciet lai cungj lai yiengh. Baengh aen daizheiq hozdung minzsuz, Baksaek Si gyauhgingj bouhmonz senjbaij boux minzgingj ndaej suggvenq yungh vah minzcuz vunznoix haeuj mbanj, gangj anqlaeh、fat cienzdan、cienz cihsiz, ciengqgok gyaudoeng ancienz senhconz “heiq minzcuz”.

  Doiq gij vwndiz daengx si gyaeujvunz minzcuz vunznoix lai, mbangj vunzlai minzcuz vunznoix mbouj miz geijlai fapceih gvanhnen, aen si neix gyauhgingj doenggvaq gij hingzsik vunzlai haengj dingq gyaez yawj haenx, haiguh gij hozdung senhconz gyaudoeng ancienz hingzsik lai yiengh haenx. Doengzseiz, baengh daengx si 134 aen camh guenjleix gyaudoeng ancienz yanghcin caeuq 1800 aen camh gienqson gyaudoeng ancienz lajmbanj, gyauhgingj bouh- monz dawz gyaudoeng ancienz cihsiz、gyaudoeng faplwd fapgvi soengq haeuj mbanj minzcuz vunznoix.

  Ciuq cam rox, baeznaengz daengz ngoenzciet, Baksaek gyauhgingj lij youq dieg vunz comzyouq、bakroen youqgaenj laeb diemj son’gyauq senhconz gyaudoeng ancienz, fat vehmanva、mbawlig venj、mbawdoz venj gingjsi、ceksaw senhconz daengj gij swhliu bujfaz miz faplwdsingq、cihsizsing caeuq mizyinx haenx, gyagiengz vunzlai ancienz、vwnzmingz gyaudoeng yisiz, sonyinx vunzlai gag souj gyaudoeng ancienz fapgvi.

  (Lingz Cungh)

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部