当前位置: Sawcuengh > saehmoq

Vanzgyangh Yungh Lai Cungj Banhfap Baujhoh Vahmauznanz

2018年09月14日    来源:广西民族报网    字号:[    ]

环江多措并举保护毛南族语言

  Vanzgyangh Mauznanzcuz Swciyen dwg aen swciyen Mauznanzcuz daengx guek dandog, daengx yienh gyaeujvunz Mauznanzcuz 6.4 fanh, ciemq 16.92% cungjgyaeujvunz daengx yienh. Mauznanzcuz dwg daengx guek 22 aen minzcuz vunznoix gyaeujvunz 10 fanh boux doxroengz ndawde aen he.

  Vih baujhoh vah Mauznanzcuz, Vanzgyangh geij bi neix daeuj daj lajneix geij aen fuengmienh haiguh swnjcienz hozdung: It dwg banh Vahmauznanz gangj gojgaeq doxdax, cung、siuj hagdangz Yananz Yangh dieg comzyouq Mauznanzcuz binaengz cungj banh “Vahmauznanz gangj gojgaeq doxdax”. Doenggvaq doxdax, youq ndawhag、ndaw gyoengq hagseng caux ok gij heiqfaenh ndei gangj Vahmauznanz, gungganq gij sibgvenq hagseng gangj vah minzcuz bonjfaenh. Ngeih dwg hoizguh denyingj Vahmauznanz, geij bi neix daeuj, bouhmonz guhhong minzcuz gonqlaeng yungh Vahmauznanz fanhoiz denyingj 《Betcib Ngeih Bouxmaenh’ak Laujliuzcangh》caeuq 《Yaengx Fwngz Hwnjdaeuj 2》 gig miz geiqniemh hoenx ciengq yiyi haenx, youq mbanj vunzlai Mauznanzcuz comzyouq dauqcunz cuengqingj mbouj aeu cienz, it fuengmienh gyagiengz gij cingz gyaez guek vunzlai Mauznanzcuz, lingh fuengmienh gyagiengz vunzlai Mauznanzcuz lai nyinhdoengz vah minzcuz bonjfaenh. Sam dwg ciengq fwen Vahmauznanz, soucomz 10 lai hot fwen Mauznanzcuz, guhbaenz conhciz fwen Mauznanzcuz 《Fwen, Daj Gizneix Mbin Daeuj》 doisoengq hawj gwnzbiengz, cungfaen langhbaij gij yisuz vah Mauznanzcuz. Linghvaih, yungh hozdung angqhoh ngoenzciet banh hozdung doxdax fwen Mauznanz hingzsik lai yiengh、neiyungz fungfouq haenx, yiengq gwnzbiengz doigvangq Vahmauznanz. Seiq dwg boqcuengq saehmoq Vahmauznanz, Vanzgyangh Gvangjbo Densidaiz hailaeb lanzmoeg saehmoq Vahmauznanz, ngoenznaengz banhaemh boqcuengq saehmoq Vahmanznanz, hawj gyoengq vunzlai lai rox Vahmauznanz. Haj dwg bangcoh haiguh hong hwnjguh aen cang yaemsiengq soqgawq baujhoh vah Mauznanzcuz, gaenq guhsat hong saemjdingh、fatyaem、loegyaem、loegsiengq 4000 lai cih vahyaem sawloih Vahmauznanz caeuq gangj、loegyaem、loegsiengq vahliuh ciengzbien.

  (Mungz Siyiz)

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部