当前位置: 首页 > 民族教育

首届全区中学生壮语标准语诵读比赛作品选登

2018年10月22日    来源:广西民族报网    字号:[    ]

自治区教育厅民族教育处处长覃艳娟为获得一等奖的选手颁奖。

获得二等奖的选手上台领奖。

获得三等奖的选手上台领奖。

  Mbanj gou dwg aen mbanj Cuengh, vunz mbanj gou cungj gangj Cuengh. Gou gag nyinhnaeuz, Vahcuengh mbanj dou miz di daegsaek. Gou youq neix dan dawz aen vamingzdaeuj gangj, mwngz couh rox daegsaek vah mbanj gou lo. Gou dajiq biek mbanjranz daengz seizneix gaenq miz geijcib bi lo, geijcib bi neix daeuj gou cungj youq baihrog guhhong, youq baihrog baenzranz , dauqma mbanjranz gig noix, bingzseiz hix mbouj miz vunz caeuq gou gangj vah mbanj gou. Hoeng gou mboujdan lij rox gangj vah mbanj dou, aen vamingz daegbied haenx gou lij geiqndaej maenhmaenh bae. Yienghneix gangj ha, aen vamingz couh lumj aen ndoengcoengz henz mbanj gou, mboujguenj gou raen gvaq geijlai bya sang bya hung caeuq bya mizmingz, daj iq daengz laux gou cungj lumz mbouj ndaej aen ndoeng henz mbanj, cungj gingciengz fangzhwnz loq daengz de.

  Aen vamingz neix heuhguh “ndaengngaeu”. Vunzraeuz bouxboux miz aen ndaeng, mbouj miz aen ndaeng baenzlawz diemheiq, mbouj miz aen ndaeng diemheiq couh dai vunz lo. Hoeng aen ndaeng vunz boux caeuq boux mbouj doengz, miz vunz aen ndaeng benj di, miz vunz aen ndaeng sang di. Vunz namzfueng caeuq vunz baekfueng doxbeij, aen ndaeng vunz namzfuung aeu benj lai di. Hoeng mbanj dou miz goenglaux he aen ndaeng de caeuq vunzmbanj mbouj doxdoengz geijlai, aen ndaeng de youh sang youh ngaeu, aen ndaeng de ngaeu lumj yienghlawz, vunzmbanj naeuz ngaeu lumj duz roeggyaeujmeuz. Dai lo, ngaeu baenz yienghhaenx lij baenzvunz ha, vunzmbanj miz di gangjboq lo.

  Goenglaux ndaeng ngaeu neix dwg goengseiq gou, vunzmbanj heuh de guh “goengndaengngaeu”, dwg aenvih de guhvunz ged lai. Bouxvunz ged caeuq ndaeng ngaeu miz maz gvanhaeh? Laxlawz dwg yienghneix: Vunzmbanj siengj ciq ngaenz goengseiq, de mbouj ciq couh suenq lo, lij maij aeu aen ndaeng daeuj “hwngj” sing ndeu, gij sing’yaem gig nanzdingq, yienghneix vunz couh heuh de guh “ndaengngaeu” lo. Goengseiq ged baenz yienghlawz, gou ndaejgeiq gienh saeh he gig cingcuj. Seiqcib lai bi gonq, seizhaenx ranzranz lij hoj lai, ra gwn cungj nanz ndaej gwn imq. Hoeng mboujguenj baenzlawz hoj baenzlawz gungz, bouxlaux mbanj dou gvaq cieng cungj aeu hawj lwgnyez fungbau. Daengz cieng le, dou lwgnyez cungj maij bae ranz vunz ndaw mbanj baiqnienz, daengz ranz vunz le, raen bouxlaux couh bak van gangj gawq “goengheij fatcaiz”! Bouxlaux couh hawj geij faen ngaenz fungbau. Seizdaih haenx cienz gig daejyungh, geij faen cienz couh doh cawx vanj faenj gwn lo. Bihaenx gvaq cieng, gou bae ranz goengseiq baiqnienz, siengj aeu aen fungbau he. Boh gou naeuz mwngz gaej bae lo, bae hix dwg faen cienz cungj aeu mbouj ndaej. Gou mbouj saenq vah daxboh, caiqgangj goengseiq lij dwg goeng gou, couhcinj mbouj caen geijlai hix dwg daxgoeng. Gou daengz ranz goengseiq le, dingqnyi de youq ndaw rug ae, couh youq rogding caj de okdaeuj. Caj bae caj dauq, gou dingqnyi goengseiq youq ndaw rug ok nyouh haeuj doengj bae yiengjsasa song baez lo, de lij ndoj gou mbouj okdaeuj. Seizdaih haenx vunz mbanj dou cungj dwg youq ndaw rug dwk aen doengj ok nyouh, mwngz nyouh gaenj ndoj ndaej gou, haex gaenj baenzlawz guh ne? Gou naengh maenhmaenh youq rogding caj goengseiq. Yaek gvaq buenq ngoenz le, goengseiq caen haex gaenj lo, de dingj mbouj ndaej le buet okdaeuj, gou sikhaek couh heuh naeuz “goengseiq goengheij fatcaiz”! De itmienh han itmienh buet ok rog bae naeuz “ok haex gonq”. Gij eiqsei de dwg mboujmiz seizgan hawj fungbau, gizsaed dwg siengj ndoj gvaqbae. Cajdaengz de dauqma ranz le, raen gou lij naengh youq ranz de. Baezneix de mboujmiz banhfap lo, gou riu dwk caj de hawj gou fungbau. Hoeng gou baenzlawz cungj siengj mbouj daengz, de dawz hoh oij he dangguh fungbau hawj gou……

  Gienh saeh neix gvaqbae geijcib bi lo, seizneix gou dawz daeuj gangj hawj lwg gou dingq, yaek son lwg guh vunz gaej ged lai.

  Hoeng gou youh siengj mbouj daengz, daeglwg baenzneix han gou:“Daxboh ha, mwngz naeuz goengseiq mwngz ndaeng ngaeu lai, vih maz aen ndaeng mwngz mbouj ngaeu ne? Aen ndaeng mwngz mbouj ngaeu, haih dwk gou ciep ndaej mwngz aen ndaeng hix mbouj ngaeu. Gou caen siengj bae guh soujsuz coih aen ndaeng bienq ngaeu bae!”

  “Mwngz uk baenzbingh ha? Aen ndaeng ndei ndei aeu guh maz soujsuz?” Gou mbouj rox daeglwg siengj gijmaz.

  Daeglwg gig nyinhcaen naeuz: “Daxboh mwngz hix rox boux yenjyenz gig mizmingz Yanghgangj heuhguh Liuz Dwzvaz, aen ndaeng de ngaeu ndaej gig baenz yawj, bouxcoz cungj maqmuengh miz aen ndaeng lumj de!”

  Gou youh lwnh daeglwg dingq: Vunz mbanj dou cungj naeuz bouxvunz ndaeng ngaeu ged lai.

  Daeglwg riu naeuz: “Daxboh ha, seizneix dwg seizdaih lawz le, Liuz Dwzvaz ndaeng ngaeu lai, hoeng de mboujrox gien geijlai ngaenz hawj bouxhoj gvaq!”

  Seizdaih gou riu ndaeng ngaeu, seizdaih lwg gou maij ndaeng ngaeu. Gou mbouj rox gangj maz ndei lo.

  Mbanj gou dwg aen mbanj Cuengh, vunz mbanj gou cungj gangj Cuengh. Gou gag nyinh-

naeuz, Vahcuengh mbanj dou miz di daegsaek. Gou youq neix dan dawz sam aen vamingz

daeuj gangj, mwngz couh rox daegsaek vah mbanj gou lo. Gou dajiq biek mbanjranz daengz seizneix gaenq miz geijcib bi lo, geijcib bi neix daeuj gou cungj youq baihrog guhhong, youq baihrog baenzranz , dauqma mbanjranz gig noix, bingzseiz hix mbouj miz vunz caeuq gou gangj vah mbanj gou. Hoeng gou mboujdan lij rox gangj vah mbanj dou, sam aen vamingz daegbied haenx gou lij geiqndaej maenhmaenh bae. Yienghneix gangj ha, sam aen vamingz couh lumj aen ndoengcoengz henz mbanj gou, mboujguenj gou raen gvaq geijlai bya sang bya hung caeuq bya mizmingz, daj iq daengz laux gou cungj lumz mbouj ndaej aen ndoeng henz mbanj, cungj gingciengz fangzhwnz loq daengz de.

Fungsaenq Sij Hawj Siz Doxgoeng

一封写给习爷爷的信

蒙婕,河池环江毛南族自治县民族中学1705班。指导老师:兰李念、韦建伟

Siz doxgoeng gingqgyaez:

  Mwngzndei! Gou dwg boux hagseng ndaw byalaeg ndaej daegz aencingz dangj caemxndang ndeu, ngoenzneix gou daiq daeuj gij vahdaengq daxbuz gou, rungj dwk gij simcingz gikdoengh hawj mwngz sij saenq. Daxbuz ciengxzseiz youq gok rwz gou raemh: Seizneix gij gwndaenj raeuz fatseng gij bienqvaq mbwn fan deih byonj, neix cungj dwg aenvih dangj caeuq guekgya cwngcwz ndei ya. Mwngz doeg saw lai, mwngz hawj boux lingjdaauj aen Dangj raeuz sij fungsaenq ndeu ba, lwnh gij bienqvaq ranzmbanj raeuz hawj gyoengqde dingq, docih gyoengqde gvensim caeuq bangcoh, cingj gyoengqde cuengqsim—Raeuz seizseiz dingq dangj gangj, ciengxlwenx riengz dangj byaij!

  Siz daxgoeng, mwngz rox lwi? Ranzmbanj gou bienq lengj lai lo.

  Gaxgonq diuz roen ranzmbanj gaebgeb lumj diuz saihwet lwgnyez yienghhaenx, gwnz roen gumzgumz gamxgamx. Byaij youq gwnz roen, namhfaenx lumj mbouj fug apbik neix, mbinbyangbyang hwnjdaeuj, lumjnaeuz yaek nauh ciengz gwzming doemfaenx hungmbwk ndeu. Baez bungz ngoenz doekfwn. Gij naezngawh oepsaep dauqcawq sinzcanzcanz, lumjbaenz mbouj dawz boux byaij roen bienqbaenz boux vunznamh sim de cix mbouj nyuenh nei. Doeklaeng, Gunghcwngzdui “Mbanjmbanj Doeng Goengloh” haeuj mbanj dou daeuj, daiq fukheiq daeuj hawj dou. Boux gisuzyenz mboujlwnh bongjrumz doekfwn, ngoenzngoenz cagaenj guhhong, gyoengq vunzmbanj hix gaenx boiqhab, seizneix diuz “roennamhboengz” ranzmbanj lumj saihwet neix gaenq bienqbaenz diuz lohsuijniz gvangqlangh, aenci youq gwn loh baebae dauqdauq mbouj ngaiz laengz lo. Henz daihloh gofaex sangnengneng caezcingj baiz dwk, lumj bouxbing hensouj mbanjranz. Baez daengz ban haemh, baenz aen baenz aen lohdaeng doxiu ronghdaeuj, caeuq gij ndauqndeiq gwnzmbwn doxingj guhcaemz, laebbaenz diuz funghgingj lengjlili ndeu, dajcang ranzmbanj ndaej lumj sei lumj veh. Siz Daxgoeng, ranzmbanj gou bienq ndaej gyaeundei lo! Daxbuz gou naeuz: Neix gyonj dwg aenvih Dangj caeuq guekgya yiedsim bangcoh ya, sou aeu seizseiz dingq dangj gangj, ciengxlwenx riengz Dangj byaij!

  Siz Daxgoeng, mwngz rox lwi? Seizneix, dou lwgnyez lajmbanj moix boux cungj gojyij naengh youq ndaw gyausiz ronghsagsag hwnjdangz lo.

  Gaxgonq haujlai lwgnyez aenvih ndawranz gungzhoj mbouj ndaej hwnjhag roxnaeuz mbouj ndaej mbouj doiqhag youq ranz, doengh gij lwgnyez ndaej hwnjhag haenx, hix cijnaengz youq ndaw aenranz vaihvad、byoengqbyang haenx hagsib. Mboujmiz saw, lauxsae cijndaej buet bae geij cib leix roen gyae ciq aeu; mboujmiz faenxbit, lauxsae cijndaej yungh gyaeujdanq youq gwnzciengz sij saw. Baenz fouq baenz fouq lwgda ngah saw haenx, couh yienghneix deng ngaenzcienz gungzhoj cwhoemq; baenz boux baenz boux dungxcaiz coengmingz haenx, couh yienghneix deng yienhsaed doeglad hoemqmoek lo. Hoengq, seizneix ndei lo, guekgya saedhengz le “song mienx it bouj” cwngcwz. Dou hwnj hag mboujdanh mienxbae cienz yozcazfei caeuq cienz saw, caemhcaiq moix ndwen lij ndaej daengz geukgya gwndaenj bujcu, dou lwgnyez lajmbanj moix boux cungj gojyij naengqh youq ndaw gyausiz ronghsagsag hwnjdangz lo.

  Siz daxgoeng, mwngz rox ndwi? Dou seizneix cingq byaij youq gwnz lohhung gwndaenj siujgangh.

  Ranzhenz gou miz boh’au ndeu singq Danz, gaxgonq aenvih diuzga canzfeiq, hengzdoengh mbouj fuengqbienh, gwndaenj fuengqmienh gig hoj, dwg ranzhoj cib leix bet fueng mizmingz. Daj “cingcinj fuzbinz” gunghcozdui roengz daengz ndawmbanj, guh“boux doiq boux” banghfuz malaeng, itciet cungj bienq lo! Fuzbinz ganbu bang de banhleix liux cienznoix sinyung daiqgvanj, lij dawz daeuj cienz canjyez fuzbinz, gujli de youq ndaw reihnaz swhgeij caeuq caencik cwngzbau haenx, dajndaem makbugnohnding, moixbaez bungz daengz gisuz vwndaez, yienh lingjdauj youh baih cien’gya daeuj songyau, fwngz gaemh fwngz son gingqniemh hawj de. Seizsou cibnyied, gva mak homfwg, gij makbugnohnding Danz boh’au hix dwg venj rim gwnz faex. Cingqdangq seiz de vih gai makbug aen vwndaez neix najsaep, Gvangjsih Densidaiz “Dangjgiz lingjhangz, densangh fuzbinz” lanzmuz baenz bang baenz doih daeuj daengz mbanjranz Mauznanz, yiengq gyoengq boux ndaem makbug haenx yaengx gij fwngz doxbang daeuj lo. Seizneix gij makbugnohnding Danz boh’au gyoengqde gaenq byaij ok Vanzgyangh, byaij ok Gvangjsih, byaij coh daengxguek. Siz daxgoeng, mwngz rox lwi, Danz boh’au caeuq dou itheij duet liux mauh gungzhoj, gyoengqdou cingq byaij youq gwn diuz loh siujgangh! Daxbuz gou naeuz: Neix dwg aenvih Dangj caeuq guekgya cwngcwz ndei ya, sou aeu seizseiz dingq dangj gangj, ciengxlwenx riengz dangj byaij.

  Siz daxgoeng, gou lij siengj doiq mwngz gangj: Mwngz sinhoj lo! Vihliux lwgminz gwndaenj ndei, vihliux guekgya engqgya hungmbwk fukhwng, mwngz yungh caenh cienzbouh simlwed!Siz daxgoeng cingj mwngz cuengqsim, dou vih seizseiz dingq Dangj gangj, ciengxlwenx riengz dangj byaij! Dou vih yungh seizcoz caeuq sengmingh yungz haeuj ndaw ciengz gaijgwz rumz hwnj fwj doengh bae.

  Boux hagseng ndaej Dangj aencingzcaemxndang ndeu 

Hawfwen Sam Nyied Sam

三月三歌圩

罗晗迅,来宾市忻城县民族中学17(7)班  

  Gak boux bingzveij, gak boux lauxsae, daihgya ndei! Gou dwg boux daih hau. Gou aeu gangj dih daizmoengz dwg Hawfwen Sam Nyied Sam.

  Bouxcuengh gig maij eu fwen, baez bungz gvaqciet、baehaq、aeubawx roxnaeuz soengqcangq, cungj aeu comz daeuj eu fwen. Bouxcuengh heuh neix guh “hawfwen”.Daegbied dwg binaengz sam nyied sam, seiqhenz vangraeh geij cib leix bouxlaux lwgnyez, cungj angqangq yangzyangz daenj buhmoq gyaeundei ganj daeuj “hawfwen” doxcomz. Vunz ceiq noix hix miz geij bak vunz, vunz ceiq lai miz geij cien roxnaeuz saek fanh vunz, vunz lai vunz daih, fwen goksadsad, hawj mbanj Bouxcuengh gyaeundei bienqbaenz haij fwen.

  Hawfwen dwg ndawbiengz Bouxcuengh conzdungj vwnzva hozdung, hix dwg gij dieg lwgmbauq dahsau daeuj raen naj doxgyau. Ciuq saw ciuhgonq sij naeuz, youq Sungdai Bouxcuengh gaenq hwng guh hawfwen.

  Hix miz cienz gangj dwg Liuz Sanhcej. Sing fwen Liuz Sanhcej gig ndei, deng fung guh “Fwen Sien”. Gyoengq caizcawj haemz fwen bauhloh aen coih gyoengqde, couh baij vunz hwnj bya bae, gvej gaeu goenq, hawj Liuz Sanhcej doek roengz ndawlueg dai bae le. Yienghneix, gyoengq vunz raeuz couh youq Sam Nyied Sam ngoenz dai de ciengq fwen daeuj geiqniemh “Fwen Sien”.

  Ngoenzneix gvangjsae ndei raixcaix. “Fwen Sien” Liuz Sanhcej couh dwg mbaw mingzbienq ndei ndeu.

  Youq gwnz hawfwen Sam Nyied Sam, gak mbanj lwgmbauq dahsau, sam haj boux guh bang, bae ra bouxcoz mbanj wnq, caezgya doxdoiq eu fwen. Ciengzseiz cungj dwg bouxsai sien eu “fwen youzlah”, cazyawj dahsau baenzlawz yiengh; bungz daengz dahsau ngamjeiq haenx, couh eu “fwen doxraen” caeuq “fwen doxiu”; dahsau han wngq le, couh eu “fwen cam”, song mbiengj eu ndaej dawzyinx le, couh eu “fwen doxgyaez”; doeklaeng doxbiek lo, couh eu “fwen soengqbiek”. Gij fwen haenx doq bien doq eu, doxbeij gig ngamj, unqswnh hawj vunz sim doengh. Daengx aen hawfwen cungj ndaej raen gyoengq dahsau nyaenqyuemyuem goemz gyaeuj doxcomz gangjsebseb, gyoengq daegmbauq hix mwngz nyoengx gou rag angqvauvau, lwgnyez youq ndaw vunzlai doxangq doxgyaep,vunzlaux cix cit ien vauvau roxnaeuz umj lwg aemq lan, bouxboux cungj najriu naj hai, simlangh dangqmaz.

  Hawfwen mboujdanh miz fwen, lijmiz guh’angq gakcungj gakyiengh. Youq gwnz hawfwen “sam nyied sam”, vunz Bouxcuengh moixbi cungj guh gij hozdung daq diengzva、baij daiz fwen、dwkdom、duek gyaeq hoengq、ciengj bauqva daengj gig miz minzcuz daegsaek.

  Riengz dwk seizdaih cinbu, hawfwen “sam nyied sam” caemh demgya haujlai yenzsu sizdaiganj. Lumjbaenz gaenh geij bi neix daeuj, hawfwen “sam nyied sam” couh miz: Cien vunz diuq faexcuk、biujyienj soujngaeh goengfou ndawbiengz、civa ganj hawfwen、gag hai ci yawj gingjsaek、yungh Vahcuengh gangj vahriu gojgaeq caeuq siujbinj vanjvei、vujsuz doxbeij daengj vwnzva hozdung, hawj hawfwen demhaeuj gij yendai gohgi caeuq vwnzva dwzcwngh engq lai engq singjsien.

  Ngoenzneix gou couh gangj daengz gij neix.

  Docih daihgya!

Haeuxnaengj Hajsaek

五色糯米饭

李彩艳,田林县初级中学。指导老师:黄秀碧

  Gak boux lingjdauj,gak boux beixnuengx ,daihjgya ndei !

  Gou dwg 35 hauh senjsouj , gou doegsaw daezmoeg dwg.

  Cienz gangj, doenghbaez Mbanjcuengh miz daeg hauxseng ndeu heuhguh Daegnuengx, daxboh de senq couh gvaqseiq lo, cijmiz daxmeh gyad ndeu caeuq de doxbaengh doxgauq. Daegnuengx gig hauqswnh, lau daxmeh bouxdog youq ndaw ranz daiq mbwq lai,mizseiz hwnj bya guh hong roxnaeuz bae ndaem naz, de cungj aemq daxmeh caez bae. Moix baez de lij daiq bau haeuxnaengj ndeu cuengq youq henz ndang daxmeh, hawj daxmeh dungxiek seiz ndaej swnh fwngz aeu ma gwn.

  Doengh gij saeh neix deng duz lingz ndeu yawjraen lo,miz baez ndeu,de couh swnh Daegnuengx daengz baihhaenx bae guh hong seiz,menhmenh roh daengz henz ndang daxmeh, dawz bau haeuxnaengj

  ndatfodfod haenx caeg bae lo,daxmeh doengh mbouj ndaej, cijndaej byaengq da yawj duzlingz buet deuz. Lienzdaemh geij baez cungj dwg yienghneix. Daegnuengx miz baez ndeu bungz raen le, couh swnh fwngz euj nye faexraeu ndeu gyaep duzlingz.Sawqmwh de fatyienh fajfwngz bonjfaenh deng faexraeu nyumx dwk ndaemndatndat.De baez fwt siengj, sikhaek euj haujlai nye raeu ma ranz,dub yungz le cimq raemx,caiq yungh gij raemxndaem neix cimq haeuxcid,ngoenz daihngeih lauzhwnjdaeuj le caiq naengj, daengx ranz cungj rang dangqmaz.Daegnuengx caeuq daxmeh gwn gij haeuxnaengj ndaem youh rang youh diemz haenx, ndawsim hix angq raixcaix.Ngoenzhaenx cingq dwg liggaeuq sam nyied sam,Daegnuengx caeuq daxmeh yungh mbaw gyoij suek haeuxnaengj ndaem hwnj bya guh hong,duzlingz yawjraen haeuxnaengj ndaemndatndat,ganjnaeuz ndawde miz doeg,couh mbouj ganj caiq caeg lo.

  Ngoenzhaenx, Daegnuengx gwn gij haeuxnaengj ndaem neix le,hoz mbouj hawq,mbouj nywnx,dauqfanj roxnyinh daengx ndang cungj miz rengz,yienghneix ,Daegnuengx ngoenzhaenx guh hong guh ndaej ceiq lai.Doeklaeng ,vunz Mbanjcuengh cungj doxciengj hag Daegnuengx, ranzranz hohhoh hag guh haeuxnaengj ndaem.Riengz roengzdaeuj ,vunzlai youh ciemhciemh yungh mbawraeu、gogyaemq、go’gienggosih)daengj daeuj guh haeuxnaengj ndaem、aeuj、henj、hoengz,gya hwnj haeuxnaengj hau,haeuxnaengj hajsaek couhdwg yienghneix daeuj lo.

  Ciuq ndaw sawyw gangj,goraeu、go’gyaemq、go’gieng cungj ndaej sanq hwngq liengz lwed,hawj ndaw ndang vunz lwed byaij ndaej swnh,doiq ndang vunz gig mizik.

  Youq mbanjcuengh , moix bi daengz hawfwen Sam Nyied Sam 、ciet cingmingz daengj,ranz Bouxcuengh cungj aeu guh haeuxnaengj hajsaek,yungh daeuj bau bae ganj hawfwen,roxnaeuz

  baiq cojgoeng.Seizhaenx, qyoengqvunz senj gij haeuxcid ceiq ndei haenx swiq cingh le,cimq youq ndaw raemx goraeu、go’gyaemq、go’gieng gosih(红汁草)haenx bae, ngoenz daihngeih dawz haeuj ndaw caengqfaex bae naengj cug,guhbaenz ndaem、aeuj、henj、hoengz、hau haj cungj saek

  haeuxnaengj, cungj haeuxnaengj hajsaek neix yienghsiengq ndeiyawj ronghsien,homfwdfwd、cehceh yinzrwdrwd unqnemnem; mboujdan miz heiq rang haeuxcid,lijmiz heiq rang goraeu、go’gyaemq、go’gieng、gosih dem, vunz gwn le, cungj mbouj roxnyinh nywix.

  Vunz Bouxcuengh gig maij gwn haeuxnaengj hajsaek,lij dawz de yawj baenz dwg gitleih habsim、ngaenz haeux demsou. Ranz Bouxcuengh guhbaenz haeuxnaengj hajsaek le, mboujdan vunz ndaw

  ranz caez gwn, yungh daeuj baiq cojgoeng, lij faen hawj seiq henz ranz beixnuengx baengzyoux gwn,eiqsei dwg maqmuengh beixnuengx caencik baengzyoux bouxboux ndangcangq miz saeh ndei,

  Seizneix,haeuxnaengj hajsaek gaenq bienqbaenz cungj gijgwn conzdungj dieg Bouxcuengh ndeu, daegbied dwg youq seizcin,gyoengqvunz gvaq ciet roxnaeuz doxcomz seiz,cungj haengj guh haeuxnaengj hajsaek gwn.

  Youq neix, Gou maqmuengh gak boux beixnuengx raeuz cungj ndaej lumj daegnuengx ityiengh,ndiepgyaez bohmeh,gvansim bouxlaux,hawj raeuz doxcomz caez gwn haeuxnaengj haisaek seiz, cungj nengz gamjdaengz ndaw biengz raeuz raeujrubrub.

  Gou doeg sat lo, docih !

 Danqhaenh Dangj Yinghmingz

歌颂党英明

黄千雅,那坡县民族初中八年级一班,指导老师:岑艳芳 梁爱明 原文作者:滕明新 兰小云

  Giuz baengh rin guh daej,

  Roeg baengh faex yinghyungz;

  Bouxcuengh raeuz mizmuengh,

  Cungj baengh dangj yinghmingz.

  Gangj 《Sawcungh Fangh’an》,

  Lwglan miz fukheiq;

  Aencingz dangj aeu geiq,

  Fanh daih gaej lumz cingz.

  Roekcib bi fwnrumz,

  Nanz lumz dangj aencingz;

  Guh fwen daihgya dingq,

  Youq ndawsim geiq maenh.

  Ok 《Sawcungh Fangh’an》,

  Ganq lwglan duh raeuz;

  Lwghag gvai youh gyaeu,

  Boux caeuq boux coengmingz.

  Beixnuengx sim doxlienz,

  Ciengeiz geiq haeusim;

  Sawcuengh lumj naedgim,

  Seih Baekging soengq bauj.

  Naedgim raeuz Sawcuengh,

  Muengh raeuz henhoh ndei;

  Cunghyangh faenh cingzngeih,

  Lwglan geiq gaej lumz.

  Aencingz laeg baenz haij,

  Raeuz hai sing haenhndei;

  Bouxboux cungj aeu geiq,

  Aeueiq saw bonjfaenh.

  Hai sing daeuj danqhaenh,

  Caenh haenh dangj yinghmingz;

  Gyoengq Bouxcuengh lwgminz,

  Dingq haeuj sim haeuj rwz.

  Caez haenh dangj yinghmingz,

  Cwngcwz dingh ndaej ndei;

  Gak minzcuz itheij,

  Caez gvaq ngoenz vuenyungz.

  Caez haenh dangj yinghmingz,

  Yih lwgminz caux saw;

  Mbouj hawj raeuz hukngawz,

  Cauh cihsaw bang raeuz.

  Sawcih dwg Lahdingh,

  Hag cingqcaen yungzheih;

  Rox gangj couh rox geiq,

  Raeuz ceiq gyaez bae hag.

  Vahcuengh boq sinhvwnz

  Baengh dangj cwngcwz ndei;

  Naengh ndaw ranz swhgeij,

  Ndaej rox saeh lajmdwn.

  Caez haenh dangj yinghmingz,

  Caencingq muengh raeuz ndei;

  Son vah saw swhgeij,

  Cuengh Gun caezcaemh doeng..

  Aeu Gun hag cihsiz,

  Cuengh cix swnj vwnzva;

  Ndaw hag lumj suenva,

  Rang gvaq doengh gvaq mbanj.

  Vacuengh son gisuz,

  Daxbuz dingq cungj rox;

  Ndaem ciengx baengh gohyoz,

  Ranzhoj bienq ranzfouq.

  Dangj raeuz yinghmingz lai,

  Hai Vahcuengh gvangjbd;

  Miz dangj daeuj goqhoh,

  Ngoenz goj van baenzdiengz.

  Caez haenh dangj yinghmingz,

  Raeuz hai sing guhfwen;

  Aencingz sang gvaq mbwn,

  Raeuz lwnh lwglan nyi.

  Sawcuengh daeuj ok saw,

  Hawj vwnzva swnjcienz,

  Lumj cawbauj ndaw siengz

  Cienz lwglan fanh daih.

  Denyingj haeuj ndaw mbanj.

  Vwnzlai angqvauvau;

  Guenj bouxcoz vunzlaux,

  Doxcaeuq bae yawjngonz.

  Caez haenh dangj yinghmingz,

  Baekging bae haihoih;

  Vahcuengh daeuj fanhhoiz,

  Ndaej guhdoih cam cwng.

  Gwnz hoih daveidangz,

  Angq yaeng saeh guekgya;

  Gak minzcuz danggya,

  Caez gvaq ngoenz vuenyungz.

  Caez haenh dangj yinghmingz,

  Bauj lwgminz ndangdaej;

  Ywcuengh raeuz caen ndei,

  Danyw geiq mbouj lumz.

  Baengh ywcuengh re ndang,

  Ndangcangq caux gyaranz;

  Aeu Sawcuengh okbanj,

  Hawj lwglan caux fuk.

  Caez haenh dangj yinghmingz,

  Dingh aen cwngcwz ndei;

  Sawcuengh bouxboux gyaez,

  Hag yungh caez laemxsim.

  Dangj raeuz ndei dahraix,

  Daiq raeuz byaij ngoenzndei;

  Hoh sawcuengh raeuz neix,

  Bi beij bi fanzyungz.

  

Suijdiu Gohdouz·Ronghndwen Seizlawz Miz

水调歌头·明月几时有

来宾市武宣县民族初级中学 18号选手:周洁云指导老师:韦娟

  Ronghndwen seizlawz miz,

  明月几时有,

  Dawz laeuj cam goengbyaj.

  把酒问青天。

  Mbouj rox gungdienh gwnz mbwn,

  不知天上宫阙,

  Seizneix bi lawz la?

  今夕是何年?

  Gou siengj naengh rumz dauqbae,

  我欲乘风归去,

  Youh lau laeuz gyaeu ranz lengj,

  又恐琼楼玉宇,

  Gizde nit lai ya.

  高处不胜寒。

  Yoeg duzngaeuz diuqfoux,

  起舞弄清影,

  Lumj ndawbiengz ndeigvaq.

  何似在人间!

  Cienq laeuzhoengz, ndonj cueng’va, nanz laepda.

  转朱阁,低绮户,照无眠。

  Mbouj wng ndaenq vunz,

  不应有恨,

  Doxbiek cij luenz vih gijmaz?

  何事长向别时圆?

  Vunz miz daej riu biek comz,

  人有悲欢离合,

  Ndwen miz laep rongh luenz veuq,

  月有阴晴圆缺,

  Caezcienz cungj nanz ra.

  此事古难全。

  Nyienh vunz ciengz ndiepgyaez,

  但愿人长久,

  Caemh ronghndwen ciuq naj.

  千里共婵娟。

  Ronghndwen seizlawz miz,

  明月几时有,

  Dawz laeuj cam goengbyaj.

  把酒问青天。

  Mbouj rox gungdienh gwnz mbwn,

  不知天上宫阙,

  Seizneix bi lawz la?

  今夕是何年?

  Gou siengj naengh rumz dauqbae,

  我欲乘风归去,

  Youh lau laeuz gyaeu ranz lengj,

  又恐琼楼玉宇,

  Gizde nit lai ya.

  高处不胜寒。

  Yoeg duzngaeuz diuqfoux,

  起舞弄清影,

  Lumj ndawbiengz ndeigvaq.

  何似在人间!

  Cienq laeuzhoengz, ndonj cueng’va, nanz laepda.

  转朱阁,低绮户,照无眠。

  Mbouj wng ndaenq vunz,

  不应有恨,

  Doxbiek cij luenz vih gijmaz?

  何事长向别时圆?

  Vunz miz daej riu biek comz,

  人有悲欢离合,

  Ndwen miz laep rongh luenz veuq,

  月有阴晴圆缺,

  Caezcienz cungj nanz ra.

  此事古难全。

  Nyienh vunz ciengz ndiepgyaez,

  但愿人长久,

  Caemh ronghndwen ciuq naj.

  千里共婵娟。

  Cienq laeuzhoengz, ndonj cueng’va, nanz laepda.

  转朱阁,低绮户,照无眠。

  Mbouj wng ndaenq vunz,

  不应有恨,

  Doxbiek cij luenz vih gijmaz?

  何事长向别时圆?

  Vunz miz daej riu biek comz,

  人有悲欢离合,

  Ndwen miz laep rongh luenz veuq,

  月有阴晴圆缺,

  Caezcienz cungj nanz ra.

  此事古难全。

  Nyienh vunz ciengz ndiepgyaez,

  但愿人长久,

  Caemh ronghndwen ciuq naj.

  千里共婵娟。

Seizcin

武宣县民族初级中学18(19)班 韦玉叶 指导老师:覃小兰 陈素蕾  

  Muengh hamuengh ha,rumzdoengdaeuj lo,yamqdin

  seizcindaeujgyawj lo.

  Itcietcungjlumjngamqninzsingjyienghceij, cungj

  vuenvuenyienzhai da lo.Byaronghsiennyinhcumxhwnjdaeuj

  lo,raemxciengqhwnjdaeuj lo,fajnajdaengngoenzhoengz

  hwnjdaeuj lo.

  Gijnyijlwgcaegcaegdajndawnamhconqokdaeuj,

  oiqnebneb,heuswdswd, ndeiyawjraicaix . Ndawsuenndaw

  doenghnazbaezyawjbae,baenzbenqbaenzbenqcungj

  dwg.Naenghdwk,ninzdwk,rouxringx song mbat,dikgeijga

  giuz,doxdaxbuetgeijdangq,gaebgeijbaezyahndoj.Rumzyaeng

  cififi,nywjunqnamnam.

  Gomakdauz, gomakgingq,gomakleiz,mwngzmbouj

  nyienghgou,goumboujnyienghmwngz, cungjhai rim liux

  vaganjnauhyied.Gijndinglumjfeiz,gijhoengzoiqlumj

  duzdoengz, gijhaulumjsiet.Ndawvadaiqmizgijfeih

  diemzsubsub;baezlaep da, gwnzfaexlumjbaenzcungjdwg

  makdauz ,makgingq, makleiz.Lajvagijrwibaenzcienbaenz

  baknauhyungyung,mbungmbajduz hung duziqmbinbae

  bin dauq,Vandoidaengxdiegcungjdwg:Gakcungjgak

  yiengh,mizcoh, mboujmizcoh,sanqyouqndawnyup rum

  lumjlwgda,lumjndaundeiq,lijyaepmyagmyag.

  “Cinajmboujgyoetyangzliujfungh,”mboujloek, lumj

  fwngzdaxmehlumhmwngznei.Ndaw rumdaiqdaeujgij

  heiqnamhcaehaenx,cab mizfeihdauhnywjheu,lijmiz

  gakcungjvahom,cungjyouqndawhoengheiqcumxnyinhsisi

  oemqbaenz.Duzroegdawzrongzcauxyouqndawnyupva

  mbawoiq, angqhwnjdaeuj lo, heuhbaengzyouxyinx

  doengzdoihdwkgailoenghgijconghhozsepsetgyoengqde,

  ciengq okgij go ndeidingqrwenzriri, caeuqrumzyaeng

  raemxlaedoxhuzdwk.Gwnzlaengvaizdigdinjlwgnyez

  seizneixhixbaenzngoenzboqdwkgoksasa.

  Gijfwnceiqbingzciengz,baezdoekcouhdwg song

  samngoenz.Hoenggaejsimnyap lo.Yawj,lumjbwncwz,lumj

  cimva,lumjseisaeq, deihyaenyaencez san dwk,gwnzdingj

  ranzvunzcungjgoemqcaengzhoenzmbangmongmoebnei.

  Mbawfaex cix heundaej fat rong,nyijoiqhixheudwk

  hawjmwngzlwenqda.Banhaemhseiz,diemjdaeng lo,baenz

  diemjbaenzdiemjdaengronghhenjamqyienh’ok

  doengxhaemhyouhancingyouhhoabingz.Youqlajmbanj,

  gwnzdiuzlohiq,henzgiuzrinhaenx, mizvunz gang liengj

  menhmenhbyaij,ndawreihlijmizranzgyoengqde,

  caxcagcag,youqndawfwncaemrwgrwg.

  Gwnzmbwnyiuhrumzciemhciemhlai lo.Gwnzdieg

  lwgnyezhixlai lo.Ndawsingzlajmbanj,gyagyahohhoh,

  bouxlauxlwgnyez,hixlumjganjnauhyiednei,bouxboux

  cungjokdaeujlo.Langhfwngzyiethwet, singjsagsingjsag

  cingsaenz,gakguhgakfaenhhongbae lo. ”It nienzcih

  geiqyouqseizcin”,ngamqhaidaeuz,mizhaujlaimaqmuengh.

  Seizcinlumjlwgnyezngamqdoeksengnei, dajgyaeuj

  daengz dincungjdwgmoq,de maj hung dwk.

  Seizcinlumjlwgsauiq, cangndanggyaeundei, riu

  dwk ,byaijdwk.

  Seizcinlumjbouxcozcoekcangq, mizgijgenfwngz

  caeuqhwetdinlumj diet ityiengh, daiqraeuzbyaijbaenaj.

Vujsenh Miz Denhciz,Denhciz Miz Betsien

武宣有天池,天池有八仙

龙彩妮,武宣县中学1607班? 指导老师:廖程洁 梁红密

  Ngoenzneix hawj daihgya doeg bien faenzsieng ndeu《Vujsenh Miz Denhciz,Denhciz miz Betsien》.

  Betsien denhciz youq vujsenh yienhsingz baihnamz,liz yienhsingz miz haj goengleix gyae,de dwg youq gwnz dingjbya sang.Denhciz ndaw de raemx saw liklik,henzde mbaj mbwn roeg fwen.Seiqmienh miz bet ndaek bya lumj bet dahsau nei got de dwk,bet ndaek bya neix sang daemq mbouj doxdoengz,ndaek miz ndaek yienghceix gyaeu yawj,miz di sang heuz swd,caemhcingh dwk lumj ciuhgeq gunghnij;mizdi daengjcoh gyaeugeiz,couhlumj seizneix mozdwngh nijlangz;mizdi ngeuxgyaeuj muengh yawj,lumj caeuq doengxbuengx gangj vahsaeq.Geij cien geij fanh bi gvaqbae lo,lij angq dwk gangj cingzvah mbouj roxsot;mizdi ngaemgyaeuj cim yawj raemx denhciz,gag haenh swhgeij gyaeuyawj;mizdi caenzcingz an’onj,lumj naengh youq gizhaenx ietnaiq.Daenghnaeuz banhaet miz fwj mok heux dwk,roxnaeuz doekfwn mbaq mbwn yim ,daj gyae muenghyawj,bet ndaek byaheu couhlumj youq gizhaenx diuqfoux ne !Hawjvunz lumz lumj byaij haeuj ndaw senhqing nei.Daenghnaeuz fwn ngamq dingzbae cimzyawj, youh dwg lingh yiengh maezvunz gyaeuyawj gingjsez lo,nywjfaex heuswdswd yaek dik,raemx heu bya loeg,muengh da heu mwngz couh ngaez ngwd,lumz dwk gwn,lumz liux bae ma.

  Vih gijmaz miz betndaek bya gyaeu yawj comz youq gizneix ne?Neix miz aen goj gyaeuriuz gangj:Ciuhgeq, gizneix fuenggingj gyaeu ndei,beij saenzsien digyouq lij gyaeu yawj,aen denhciz lumj gaiqging dijbauj,hawj vunz yawj le lumz baema.Gwnzmbwn miz betdah saenzsien raen vujsenh bya heu raemx loeg,couh daiq bit roengz laj biengz daeuj veh dozveh.Byawz rox daengznyaengz Bwzyazcauz fat raemxrongz,daengx dieg deng iem.Geij dahsau sinsoh gyaeuyawj saenzsien neix,couh yungh fwngz veh aen huzluh hung mbwk he daeuj suep raemx rongz,hawj doenghgo daihduz ndaej gouq.Aenvih raemxrongz daiq hung lo,gyoengqde suep le gouj hwnz gouj ngoenz le couh ngunhlaemx youq ndaw lueg,gyoengq beksing ndaej gouq lo,couh ra sam ngoenz samhwnz,dawz gyoengqde ram hwnj gwnz bya,hawj gyoengqde lij ranz de gyaeujdi,caiq gyaeujdi...

  Aenvih guhseiz baema denhgungh,vangzmuj niengzniengz rox le,hozndat raixcaix,couh dawz diuzdwngx swhgeij yiengq lajbiengz vut,gouqleix swhgeij ceiqgyaez betdah saenzsien,daengz seizneix dauq diuzdwngx neix lij cap youq ndaw denhciz.Gyoengq dahsien singj le,siengsim dwk doek raemxda,aen huzluh cang rim raemxda le sikhaek bienq baenz denhciz,bet dahsien neix hix bienq baenz bet ndaek bya,ciuhciuh daihdaih souj aen denhciz,vih gizdieg beksieng caufuz.Gij gingjneix lumj”betsien bungj nyoeg buenz”,diga bonjdieg beksing couh heuh de guh betsien denhciz.

  Aen lwngz neix gyaeuyawj dwk hawj betsien daeuj cimz,neix dwg baenzlawz hawjvunz ngaez ha!1988Nienz 9nyied 14hauh Gvangjsih bouxcuengh Swcigih yinzminz cwngfuj goenghbouh daih’it bae 22 giz Swcigih giz funghqingj mingzswng gujciz.Betsien denhciz dwg Gvangjsih aen dog denhciz ndeu,youq ndaw guek raeuz baizyouq daihsam aen cingqcaiz daengjcaj dwk.

  Denhciz mboujmiz lae haeuj ndaw de bae,de hix soqlaiz mbouj aenvih ndwenlawz doekfwn lai raenx okdaeuj,hix mbouj aenvih henx lai raemxhawq.Betsien denhciz couh dwg baenzneix saenzgeiz hawj vunz nanz lijgaij.1964nienz mbwn rengx seiz,gyoengqvunz aen geij aen couhswijgih bae caeu raemx dwk raemx naz,hoeng,geij aen couhswijgih neix cungj caeu vaih lo,raemx hix caeu mbouj hawq.Doengzseiz”Caqrin bauq mbouj yiengj,ep bya mbouj gwn set.”Lijmiz,ndaw de gingjsaek bienqvaq mbouj doxdoengz,ndaw de gijraemx banhaet, banngaiz,gyanghaemh nganzsaek hix mbouj doengz.Seizneix,raemxmienh bingz lumj qingq,raem saw raen daej,daenghnaeuz mwngzyouq laj ndit ndek hawj ndaw de geij aen ngaenzdae,lajraemx couh rox fat ok gij ronghsag luenqda ronghsagsag he,daenghnaeuz ndek gaiq rin iq hawj bae,couh miz baenz gien heuswdswd mbe hai gvaq bae.

  Seineix betsien denhciz moixngoengz cungj miz conhgyah,yozcej daeuj gvanhcangj,damyawj gizmaez.Seizneix Vujsenhyen swngfuj hix dawz betsien denciz dingh guh cungdenj baujhu caeuq cauhguh dieg lijyouz,siengsaenq de ngoenzcog engqgya gyaeuyawj maezvunz,hawj bonjdieg baksing daiqdaeuj engqlai ndeicawj.

  Baenzneix saenzgeiz,gyaeundei gingjsaek,mwngz baenzlawz mbouj bae yawjyawj ne !

Daxmeh, gou gyaez mwngz

妈妈,我爱你

钦州市钦北区民族中学(钦北区那蒙中学)276班 苏杰荣 指导老师:黄万年

  Gak boux lingjdauj ,gak boux bingzveij ,gyoengq beixnuengx ,daihgya ndei! Seizneix gou daeuj doegsaw daezmoeg dwg《Daxmeh, gou gyaez mwngz》.

  Danghnaeuz miz vunz cam gou ceiq gyaez byawz? Gou siengj hix mbouj siengj couh sing hung naeuz: “Gou ceiq gyaez daxmeh gou!”

  Boux vunz ceiq aeueiq ndeu dwg daxmeh gou. Aenvih daj iq daengz hung gij gyaez daxmeh hawj gou gig lai gig lai. Gou maj hung ndawde, miz haujlai saeh hawj gou nanzlumz .Hoeng miz gienh saeh ndeu doiq gou yingjyangj gig hung .

  Geiq ndaej gou doeg caet nenzgiz daihhaj singgiz singgiz sam , haemh haenx caet diemj lai cung gou fat ndat , lauxsae rox le sikhaek soengq gou bae yihyen , daeujdaengz yihyen, canghyw bang gou damqmeg 、damq dohraeuj, gou fatndat daengz 40 doh, husw couh bang gou dajcim. Yienzhaeuhlauxsae couh daj denva hawj daxmeh gou. Aenvih boh gou youq rog guh hong mbouj youq ranz, meh gou ciep daengz denva dingqgangj gou bingh lo, seizhaenx de guh hong ngamq ma mboujcaengz gwn haeux, de gipmuengh ra aen dendoengz rag danci okdaeuj ,couh gwih danci coh yihyen caij bae. Ranz gou liz yihyen cib ngeih 、sam goengleix, daxmeh daeuj daengz yihyengaenqgouj diemj lai cung lo. De gip dwk heiq baeg hoho, gij hanh baenz diemj baenz diemj daj goknaj dik roengzdaeuj,cam naeuz: “Cangh__canghyw, lwg___lwg gou bingh ndaej youq__youq__youq gaenj lwi?” Daxmeh gou bingzseiz gangjvah mbouj dwg yienghneix, seizneix ganj loh daiq vaiq, gangjvah gangj ndaej gaz dwddwd. Canghyw naeuz: “Gaxgonq lauxsae soengq ndaej daeuj gibseiz , daj diuqcim gij ndat couh doiq lo”. Daxmeh dingq le gij vah canghyw cij cuengqsim roengzdaeuj, de gaem gaenj song fwngz lauxsae, doiq lauxsae gou naeuz: “Lauxsae, mazfanz mwngz lo, sinhoj mwngz lo,docih mwngz,haemhneix gou youq neix buenx lwg gou, mwngz ma yozyau ba”.Lauxsae caeuq meh gou gangj geij coenz le couh ma yozyau lo. Daxmeh dawz aen fwngz de mo najbyak gou yawj lij fat mbouj fatndat. Gou nyaenx mbouj ndaej raemxda dikndakndak. Daxmeh hozunq naeuz:“Dahmwnh, daej gijmaz? Meh youq neix ne, mwngz ninz ba! ” Gangj le ,meh gou mo mo aen gyaeuj gou, gag gangj gag naeuz “Vunz ndei miz ndei bauq, baujyou lwg gou bingzan fouzsaeh......” Gou baengh youq ndawrungj daxmeh mbouj rox seizlawz ninz ndaek lo.

  Ngoenz daihngeih gou singj gvaq daeuj seiz ,gaenq bet diemj lai cung lo, raen daxmeh naengh youq henz congz, meh gou raen gou singj le, riu naeuz: “ Mbouj youqgaenj lo, ndat doiq lo, haemhlwnz mwngz cungj gangj vahloq, dungx iek le ba,gou gaenq cawx souhnoh ,swnh ndat gwn ba?”Gou bae yawj ,daxmeh song gvaengzda cungj hoengz liux, aenvih de daengz haemh mbouj ndaej ninz; youh raen fwngz swix gen de geuj gaiq baengzmuengx, gou cam daxmeh: “Daxmeh ,aen fwngz mwngz vihmaz deng sieng a?” Daxmeh naeuz: “Haemhlwnz mbwn laep lai, miz dunh loh gumzgumz gamxgamx, gou gwih ci caij ndaej daiq vaiq, mbouj siujsim lienz vunz daiq ci laemz roengzdaeuj, di sieng he mbouj youqgaenj.” Gou dingq daxmeh yienghneix gangj, nyaenx mbouj ndaej coemj haeuj ndawrungj dajmeh bae,saek sing daejsebseb hwnjdaeuj, itmenh daej itmenh naeuz:“Daxmeh !Mwngz vih gou gwnhaemz souhhoj. Vih gou aen gen mwngz deng sieng lo, doiq mbouj hwnj.” Daxmeh aeu ceij bang gou uet raemxda, mo mo gyaeuj gou,naj riunyumnyum , nai gou : “Gvai dahlwg ha, mwngz gaej siengsim, mwngz ansim yietnaiq, di sieng he mbouj youqgaenj ,song ngoenz couh ndei lo.” Daxmeh gou dwg yienghneix giengiengz, gou coengzlaiz mbouj yawjraen de lae gvaq raemxda, seizhaenx ndawsim gou roxdaengz raeuj rubrub.

  Daxmeh, gou docih mwngz! docih mwngz gvansim gou! docih mwngz ndiepgyaez gou! mwngz dwg boux vunz ceiq hungmbwk ndeu! Daxmeh ,gou gyaez mwngz! Gou itdingh aeu cingzcik ndei daeuj bauqdap mwngz!

  Gou doeg sat lo, docih daihgya.

GIJ VA MEIZYENZ

梅园的花

武宣县桐岭中学181班 廖依依 指导老师:龚家建

Gak boux bingzveij caeuq gak boux gonhcung:

  Daihgya ndei! Ngoenzneix gou daeuj hawj daihgya doeg bien faenzcieng《GIJ VA MEIZYENZ》,yungh de daeuj geiqniemh raeuz gingqgyaez dih Couh Wnhlaiz cungjlij.

  GIJ VA MEIZYENZ

  Gou gyaez va,gou gyaez gij va seiqseiz ndongqrongh hai mbouj byaiz!

  Gij va Meizyenz,daegbied hawj vunz ndeigyaez,youq ndaw da vunz,de yienh ndaej nyegvaih gyaeundei,nyegvaih hawj vunz gyaezgyoh.

  Gij va Meizyenz,cin hah cou doeng cungj mbouj sangx,it bi seiq geiq hai mbouj byaiz.Mwngz loenq le,gou hai,gou byaij le,de daeuj,lumj dwg siengliengz ndei youq gonq ityiengh.Mbouj saenq?Cingj yawj:Cin moq cieng moq,va makmoiz hai ndaej ceiq caeux,gvaqlaeng couh daengz vadiet,haijdangz hai dwk ndingmaeq,de yienznaeuz mbouj hung,hoeng,de cix hai ndaej angj byangbyang.Gaenlaeng miz vayilanz gyaemq,lij miz vavengq hau gwnz ciengz,vasiglouz nding baenz feiz,vagveiq homfwdfwd,vagut cawzcou,hai ngukngaek.Mwh vagut hai ndaej angjbyaengq seiz,vamoiz ndwenlab giet cumh baenz byoz caj ngoenz hai.

  Raen daengz vamoiz Meizyenz,couh siengj daengz bouxcawj suenva Meizyenz.De caen dwg boux yenzdingh hungmbwk ndeu.Dwg de,mbaq gwed hwnz laep,riu coux haetrongh;dwg de,dawz raemxraiz rwed doh daihdeih,gaenx doekceh,ganq miuz,daet nyez,gaj non.De baenz ciuhvunz yunghsim,vuenh daeuj va’nding biengzdieg.

  Dujduj va cungj giet miz lwed hanh de.

  Youq gwnz va,dujduj lwenq ok naj de riunyumj.

  Youq budui,gyoengqvunz raen de caeuq cansw guhdoih gwnngaiz;youq gunghcgngj,gyoengqvunz raen de caeuq gyoengq gunghyinz gangjriu;youq doenghnaz,gyoengqvunz raen de daenj mauhnyaengq caeuq nungzminz vix gomiuz gangjvah;youq ndaw mbanjbya hagdangz bienbik,gyoengqvunz raen de raek hungzlingjginh cingq caeuq gyoengq lwgnyez gangjgoj……

  De dwgrengz ciuhvunz,seizneix louzroengz va oiq daengxbiengz,de cix biek raeuz bae lo,de cungj mbouj daiq bae saek yiengh.Ndang de mboujlwnh gijmaz cungj louz hawj daihdeih,moix duj va,cungj rwed miz gij cingzngeih de.

  De bae lo,bae ndaej gig gyae gig gyae,bae liux it bi youh it bi.Seizneix siengjsiengj,lij roxnyinh saenzgeiz,bouxvunz ndeu dauqdaej miz geijlai hung maehlig,naengz hawj bouxboux vunz cungj niemh de,ngeix de,de dwg geijlai caezcienz gyaeundei,de youngeix gij saeh lajmbwn,dogdog mbouj ngeix gvaq de cihgeij.

  A,daihdeih mbouj lumz nditraeuj fwnraiz,va oiq mbouj lumz goeng canghsuen hungmbwk.Ngoenzneix sim gyaez lumj raemxhaij baenz lai,cungj cimq youq moix duj va guekcoj,cungj doengzcaez danq de!

  A,gij va Meizyenz,angj hai youq ndaw sim vunz cien vunz fanh!

Guekcoj Raeuz Hungmbwk

祖国伟大

宜州区民族中学 172班 冯尧

Gyoengq lauxsae、gyoengq dongzhak:

  Daihgya ndei!

  Ngoenzneix dizmuz doegsaw gou dwg《Guekcoj Raeuz Hungmbwk》  

  Youq lajmbwn, guek raeuz dwg aen guek hung ndeu. Daengx guek miz cib seiq fanthfanh laivunz. Miz gouj bak roeg cib fanh bingzfueng goengleix gvangq,miz Cangzgyangh、 Vangzhoz、Cuhgyangh caeuq Hwzlungzgyangh doengh diuz dah hung neix.  

  Aen guek raeuz doxgaiq gig lai, mboujdanh miz haeux caeuq faiq, vanzlij miz haijlai cung yau gunghyez swhyenz, lumj meizgvang、diet、sizyouz doengh gijneix. 

  Youq lajmbwn,gij lizsij guek raeuz goj gig gyaenanz. Geij cien bi roengzdaeuj, vunz guek raeuz cungj youq gwnz dieg gvangqlangh guekcoj raeuz, ciuh dem ciuh guhhong, caux gwn caux daenjdaengz seizneix.  

  Youq doenghciuh gyae gaxgonq, vunz guek raeuz couh rox dajndaem, rox ciengx nonsei, roxdaemjbaengz, lij rox guh ranz, doq ci doq ruz. Youq sam cien bi gaxgonq, guekcoj raeuz gaenq cauxmiz Sawgun, vunz guek raeuz geij caeux couh rox veh duzva, rox sij saw lo.  

  Vunz guek raeuz geij caeux couh rox ywbingh,haidaeuzcaux ok lazging、fapyaengsaw、guhceij、 guh siu caeuq guh swzgi.Doengh gij hong neix cungjdwg dijbauj raixcaix.  

  Vunz guek raeuz vanzlij caep hwnj diuz singz Cangzcwngz, vathai diuz dah yinhoz.Doengh gij hong hung neix, youq gwnz lizsij gig okmingz, lajmbwn cungj rox doh.  

  Guek raeuz yinzminz daj ciuhlaux roengzdaeuj cungjdwg gaenx guhhong, youhmaenh ak,mboujlau haemzhoj. Seizneix miz gungcanjdangj lingjdauj, daeng guek gak cuz yinzminz doxgiet youq giz ndeu, haenqrengz gensez seveicujyi seiq aen yendaiva. 

  Mwngz yawj guekcoj raeuzgeijlai ndeigyaez, geijlai hungmbwk ha! 

  Gou doeg sat lo,docih daihgya.

Sei Muzlanz

木兰辞

诵读者:广西民族高中 韦懿伲,指导老师:农振凤 黄花开

  

Muzlanz naengh laj cueng, ngutnget muengz daemj rok.

Mbouj nyi sing daeuq gok, sau dog gyangznaeknueng.

唧唧复唧唧,木兰当户织。不闻机杼声,惟闻女叹息。

Cam sau naemj gijmaz, cam sau miz maz ngeix.

Sau mbouj miz maz ngeix, Sau hix mbouj maz naemj.

问女何所思,问女何所忆。女亦无所思,女亦无所忆。

Haemhlwenz raen mbawdiep, goengdaeuz ciu bingmax,

cibngeih gienj saw na, gienjgienj miz boh mingz.

昨夜见军帖,可汗大点兵,军书十二卷,卷卷有爷名。

Daxboh fouz daegdaih, Muzlanz fouz daeggo,

nyienh cawx anmax moq, dingj daxboh dangbing.

阿爷无大儿,木兰无长兄,愿为市鞍马,从此替爷征。

Hawneix cawx max ndei, hawde ceiq an demh,

hawgwnz cawx momh dem, hawlaj ra bienmax.

东市买骏马,西市买鞍鞯,南市买辔头,北市买长鞭。

Banhaet biek bohmeh, haemh le henz dah ninz,

mbouj nyi bohmeh dwen lwg sing, dan dingq raemxhaenq Vangzhoz yiengjcoco.

旦辞爷娘去,暮宿黄河边,不闻爷娘唤女声,但闻黄河流水鸣溅溅。

Haet liz Vangzhoz bae, haemh caez Hwzsanh ninz,

mbouj nyi bohmeh dwen lwg sing , dan dingq max Huz Yenhsanh saehehe.

旦辞黄河去,暮至黑山头,不闻爷娘唤女声,但闻燕山胡骑鸣啾啾。

Fanhleix hoenx vunzdig, gvaq gemh gig lumj mbin.

Rumzbaek cienz singgeng, buhdiet ingj ronghnae.

Guen bing caez buekmingh, cib bi hingz dauqma.

万里赴戎机,关山度若飞。朔气传金柝,寒光照铁衣。将军百战死,壮士十年归。

Dauqma raen vuengzdaeq, vuengzdaeq naengh dienhsang.

Goenglauz suenq daeuzdaengj, hawj gim gvaq cien fanh.

Goengdaeuz cam siengj maz, Muzlanz mbouj dang Sangsuhlangz; nyienh fad duzmax ndei, soengq lwg dauq mbanjranz.

归来见天子,天子坐明堂。策勋十二转,赏赐百千强。可汗问所欲,木兰不用尚书郎;愿驰千里足,送儿还故乡。

Bohmeh nyi sau ma, doxrex ok singz coux; dahcej nyi nuengx ma, haeuj ranz cang lengjgyaeu; daegnuengx nyi cej ma, muz mid gaj mou youh gaj yiengz .

爷娘闻女来,出郭相扶将;阿姊闻妹来,当户理红妆;小弟闻姊来,磨刀霍霍向猪羊。

Hai dourug yawjyawj, naengh congz saeujyetyet,

vuenh buhbing roengzdaeuj, daenj buhvaq seizgaeuq,

daengz henz cueng roigyaeuj, ciuq gingq yub vafaeux.

开我东阁门,坐我西阁床,脱我战时袍,著我旧时裳,当窗理云鬓,对镜帖花黄。

Ok dou raen doengzdoih, doengzdoih doeksaet yat:

Caemh youq cibngeih bi, mbouj rox Muzlanz dwg dahgyaeu.

出门看火伴,火伴皆惊忙:同行十二年,不知木兰是女郎。

Douqboux luenh dik din, douqmeh maezcoco;

song de caemh byaij loh, baenzlawz yawj ok daeg rox coh?

雄兔脚扑朔,雌兔眼迷离;双兔傍地走,安能辨我是雄雌?

唱歌:(歌谱:木兰从军歌)

Haemhlwenz raen mbawdiep, goengdaeuz (de )ciu bingmax,

cibngeih gienj saw na, gienjgienj miz boh mingz.

昨夜见军帖,可汗大点兵,军书十二卷,卷卷有爷名。

Daxboh fouz daegdaih, Muzlanz (gou) fouz daeggo,

nyienh cawx anmax moq, dingj daxboh dangbing.

阿爷无大儿,木兰无长兄,愿为市鞍马,从此替爷征。

快板:

Fanhleix hoenx vunzdig, gvaq gemh gig lumj mbin.

Rumzbaek cienz singgeng, buhdiet ingj ronghnae.

Guen bing caez buekmingh, cib bi hingz dauqma.

万里赴戎机,关山度若飞。朔气传金柝,寒光照铁衣。将军百战死,壮士十年归。

Dauqma raen vuengzdaeq, vuengzdaeq naengh dienhsang.

Goenglauz suenq daeuzdaengj, hawj gim gvaq cien fanh.

归来见天子,天子坐明堂。策勋十二转,赏赐百千强。

京腔:

Vah Muzlanz cienghginh, mwngz dang Sangsuhlangz ba?

Mbouj! Nyienh fad duzmax ndei, soengq gou dauq mbanjranz.

花木兰将军,你当尚书郎吧?

不!愿驰千里足,送儿还故乡。

快板:

Bohmeh nyi sau ma, doxrex ok singz coux; dahcej nyi nuengx ma, haeuj ranz cang lengjgyaeu; daegnuengx nyi cej ma, muz mid gaj mou youh gaj yiengz .

爷娘闻女来,出郭相扶将;阿姊闻妹来,当户理红妆;小弟闻姊来,磨刀霍霍向猪羊。

Hai dourug yawjyawj, naengh congz saeujyetyet,

vuenh buhbing roengzdaeuj, daenj buhvaq seizgaeuq,

daengz henz cueng roigyaeuj, ciuq gingq yub vafaeux.

开我东阁门,坐我西阁床,脱我战时袍,著我旧时裳,当窗理云鬓,对镜帖花黄。

Ok dou raen doengzdoih, doengzdoih doeksaet yat:

Caemh youq cibngeih bi, mbouj rox Muzlanz dwg dahgyaeu.

出门看火伴,火伴皆惊忙:同行十二年,不知木兰是女郎。

唱:谱《木兰从军歌》结尾,歌词:

Cien ciuh fanh daih ciengq yinghyungz, Muzlanz dang bing daihdaih yiengz, daihdaih yiengz!

千秋万代唱英雄,木兰当兵代代扬,代代扬!

诵读(结尾):

Cien ciuh fanh daih ciengq yinghyungz, Muzlanz dang bing daihdaih yiengz, Muzlanz dang bing daihdaih yiengz!

千秋万代唱英雄,木兰当兵代代扬,代代扬!

Beizronggya

竹壳扇

诵读者:广西民族高中 韦思建,指导老师:农振凤 黄花开

  Duzbid heuh lo, seizhah youh daengz lo. Daxmeh itdingh youh dawz gaiq beizronggya de daeuj yungh lo. Yungh daeuj beiz liengz, yungh daeuj beiz nyungz.

  知了叫了,夏天又到了。母亲一定又把她的竹壳扇来用了。用来扇凉,扇蚊子。

  Gou haujlai nanz mbouj gaem beizronggya lo. Aenvih youq gizneix miz gunghdiuz, miz gak cungj denfunghsan, byawz hix mbouj yungh beizronggya lu! Hoeng gou lij siengj miz gaiq beizronggya ndeu.

  我好久不拿竹壳扇了。因为这里有空调,有各种电风扇,谁也不用竹壳扇咯!但是,我还想有一把竹壳扇。

  Ronggya youh geng youh nyangq, aeu daeuj guh beiz, naih yungh mbouj heih bienq yiengh.

  竹壳轻薄,又硬又有韧性,拿来做扇子,耐用不易变形。

  Daxmeh gou sim giuj fwngz gvai, guh beiz gig ak. Binaengz de cungj aeu ronggya ma guh beiz. De gip ronggya ma, faet raemx daenx geij ngoenz le, cij dawz daeuj daet baenz beiz. Beizronggya miz iq miz hung、miz gaenz mboujmiz gaenz, gak cungj gak yiengh.

  我的母亲心灵手巧,做扇子很厉害。每年她都要竹壳回来做扇子。她捡竹壳回来,洒水压几天了,才拿来剪成扇子。竹壳扇有小有大、有柄无柄,各种各样。

  Dauqngeix mwh lij iq, daxmeh ciengzciengz umj gou naengh youq gyanghongh. De haengj naengh daengqgeq, gou couh ai ninz youq rungj de, cwxcaih raixcaix. Daxmeh yungh beizronggya beiz gou, eu fwen lox gou ninz vaiq di. Seixneix gou lij geiq ndaej hot fwen haenx ne:(歌)

  回想小的时候,母亲常常抱我坐在院中。她喜欢坐小矮凳,我就靠睡在她的怀里,非常舒服。母亲用竹壳扇扇我,唱山歌哄我快点睡觉。现在我还记得那首歌呢。

  唱:

  “Gvaq giuz gaej lumz dwngx lo, 过桥不忘拐杖

  Gwn raemx gaej lumz mboq lo, 喝水不忘井泉

  Yiengzlwg gvih meh cix gwn neq, 小羊跪母才吃奶,

  Roeglwg fwed geng gaej lumz meh le.鸟儿羽丰不弃母。

  Cien bi fanh daih lo, 千秋万代咯

  Cien bi fanh daih lo, 千秋万代咯

  Ciengeiz gaej lumz bohmeh, 千万别忘父母

  Ciengeiz gaej lumz bohmeh le. 千万别忘父母”

  Gou ninz ndaek le, daxmeh naiq lai, hix ninz lo. Hoeng, cijaeu miz nyungz haeb gou, gou yungh lwgfwngz baez gaeu, daxmeh couh singj daeuj lo. De gipmuengz aeu bak bae cup giz humz gou, rubluh gyaeuj gou, bekbek ga gou, caiq lox gou ninz, ndawsim gou roxnyinh raeujrubrub. Seizneix, gou cij haeujsim yawj naj daxmeh, daxmeh geijlai gyaeundei, geijlai unqswnh ha.

  我睡着了,母亲太累,也睡了。但是,只要有蚊子咬我,我用手一挠,母亲就醒来。她急忙用嘴亲我痒的地方,摸摸我的头,拍拍我身子,再哄我睡觉,我的心理感觉暖暖的。这时候,我才注意观察母亲的脸,母亲多么漂亮,那么善良啊!

  Cibroek bi bihaenx,gou gauj hwnj gauhcungh le, aeu bae yienhsingz bak lai leix gyae doegsaw. Gou yaek hwnjdin seiz, daxmeh gaem beizronggya, doiq gou naeuz: “Lwg ha, yienhsingz hwngq gvaq dieg raeuz, aeu gaiq beiz neix bae ba.” Gou mbouj ciep, yiemz beizronggya yakyawj lai. Daxmeh hix mbouj gangj gijmaz……

  十六岁那年,我考上高中了,要到一百多里远的县城读书。我要起程的时候,母亲手拿着一把竹壳扇,对我说: “孩子啊,县城比我这热,拿这把扇子去吧。”我不接,嫌竹壳扇不好看。母亲什么也不说……

  Daengz yozyau le, gou moix singgeiz cungj sij saenq ma ranz. Hoeng ngamq gvaq ngeihcib lai ngoenz, daxmeh couh nyaenx mbouj ndaej lo, gag boux ndeu buet daengz yienhsingz daeuj yawj gou. De dawz gyaeqgaeq、faengx、lwgbiek daeuj. Daxmeh baez naengh roengzdaeuj couh vad gaiq beizronggya de. De gangj, yienhsingz caen hwngq gvaq lajmbanj…… Daxmeh caengz gangj sat dem, gou couh ciengj gvaq beizronggya, dawz de oet haeuj laj swiz bae. Daxmeh yaek bae ranz seiz, gou cij gawz gaiq beiz caegcaeg cuengq haeuj daeh de bae.

  到了学校,我每个星期都写信回家。但是,刚过二十多天,母亲就忍不住了,一个人跑到县城来看我。她拿来鸡蛋、粽子、芋头。母亲一坐下来,就扇她的竹壳扇。她说,县城真的比乡下热……母亲没讲完,我就抢过竹壳扇,把它塞到枕头下。母亲将要回家时,我才把扇子偷偷地放到她的袋子。

  Hai! Seizneix siengj dauq, ienqhoij ha! Seizhaenx gou caen mbouj roxsoq!

  哎!现在想来,后悔啊!那时人真不懂事!

  Gvaq mbouj nanz gou ma ranz, ranz gou an miz song aen denfunghsan lo. Aen he baij youq dingdangz, lingh aen an youq rug gou. Gou dawz de senj daengz rug daxmeh, gienq naeuz: “Meh ha, gou mbouj ciengz youq ranz, denfunghsan lijdwg an youq rug mwngz ba.” Hoeng daxmeh mbouj coengz, gangj de mbouj hwngq,lij doiq gou naeuz: “Lwg ha, mwngz ciengz ma ranz di, denfunghsan nanz lai mbouj yungh, couh hwnj myaex lo.” Gizsaed,gou rox,daxmeh lau yungh vaih denfunghsan le, lwg dauq mbouj ndaej yungh, de ningznyienh yungh beizronggya.

  过不久我回家,家里已经有两台电风扇了。一个摆在厅堂,另一个安在我房间。我把它移到母亲的房间,劝说:“我不经常在家,还是安在你的房间吧。”但是母亲不从,说她不热,还对我说:“孩子啊,你要常回家,电风扇久了不用,就生锈了。”其实,我知道,母亲怕用坏了电风扇,孩子回来不得用,她宁愿用竹壳扇。

  Ngoenzhaenx, daxmeh soengq gou okdou, gou raen fwngz de gaem gaiq beizronggya ndeu, haemq gaeuq、nyaeuqnyu lumj fajnaj de nei. Sawqmwh,gou roxnyinh daxmeh caen dwg geq lo, nyaenx mbouj ndaej raemxda doek roengzdaeuj.

  那天,母亲送我出门,我看见她手里拿着一把竹壳扇,很旧、皱巴巴的像她的脸。突然,我意识到母亲真的老了,忍不住眼泪掉了下来。

  Daengz seizneix, gou gaenq haujlai nanz mbouj raen beizronggya lo, seizlawz ndaej baema ranz, itdingh dawz gaiq beizronggya ndeu daeuj, dawz de cuengq youq laj swiz, hawj de ciengxlwenx buenx gou,buenx gou gvaq seizhah, buenx gou gvaq seizdoeng……

  到现在,我已经好久没见到竹壳扇了,什么时候能回家,一定拿一把竹壳扇来,把它放在枕头下,让它永远陪伴我,陪我度过夏天,度过冬天……

Cienzciep Hungzswz Gihyinh,Guh Boux Habgek Cunghyoz Hagseng Ndeu

传承红色基因,做一个合格的中学生

王彩花,天等县中学,翻译:李秀芳

Gak boux lauxsae bingzveij:

  Banhaet ndei!

  Ngoenzneix gij daezmoeg gou cuengq sing doeg haenx dwg《cienzciep hungzswz gihyinh,guh boux habgek cunghyoz hagseng ndeu》.

  Youq mwh yawj daengz vujsingh hungzgiz ronghsien haenx menhmenh swng hwnjdaeuj seiz,henz rwz gou couh yaek dingq nyi diuz go “vujsingh hungzgiz,gou vih mwngz ndaengndiengq, vujsingh hungzgiz,gou vih mwngz najrongh, vih mwngz angqhemq,gou vih mwngz hohfuk,aen mingzcoh mwngz,beij sengmingh gou engq youqgaenj”haenx,moix baez dingq daengz diuz go caengrim gikcingz neix,ndaw sim gou cungj yaek nyoenx hwnj guj gikdoengh geizheih ndeu.Gou ndaengndiengq,vih maj youq aen minzcuz gig miz rengzhoengh neix ndaengndiengq.Gou najrongh,vih cimq lwed buek hoenx vuenh aeu hozbingz doengh gij vunz neix najrongh.

  Lizsij mbouj ndaej lumz doengh gij yinghyungj mbouj lau,cieplaeng bae gonq,yungh lwed niujcienj diendeih,yungh aen gunghozgoz henhoh gij sengmingh raixcauh cungguek moq.Song fanh haj cien leix gyaeraez cangzcwngh,haenqheiq dingjgangq bet bi gangcan gyoengq caeg Yizbwnj haenx,gij dingj raemxroengz ciengjyiemj mbouj goq bonjfaenh ciengzmienh haenx sawj vunz gamjdoengh, neix dwg bouh saw miz bouh fwensei ciengq yinghyungz sijsih ndeu,dwg gij hengzdoengh hungmbwk baez dem baez miznaj,gyoengqde cauh ok le gij niebcik ndaengndiengq mbouj miz maz beij ndaej,sij ok le diuz go haenh cungj gingdoengh diendeih , hungmbwk bien sei daej fangzbaed.

  Hoeng hungzswz gihyinh,couh dwg cungj gwzming cingsaenz cienzciep neix.Youq henz ndang raeuz,miz haujlai cienzciep hungzswz gihyinh seizdaih senhfungh,daj Leiz Fungh daengz Goh Mingzyi, daj Gyauh Yiluz daengz Gungj Fanzswnh, daj Cienz Yozswnh daengz Huz Mwngcauh, daj Lij Dacauh daengz Liuz Cidanh……Gyoengqde yungh gij fwndou caeuq hihswngh,sij ok gij caenleix caeuq giendingh bae saenqyiengj haenx,doiq guekcoj caeuq yinzminz cungcig,gij saeh hawj vunz boiqfug,gij binjgwz de ronghswgswg,gij cingsaenz de ganjdoengh mbwn saenqdoengh deih.

  Vunz cungguek dwg hungmbwk,Cungguek engq dwg hungmbwk. “cienzciep hungzswz gihyinh”,gaenq dwg raeuz seizneix cunghyoz hagseng gij cwzyin mboujndaej doiswz.Gijneix cigsoh gvanhaeh daengz raeuz daih vunz neix dwg mbouj dwg ndaej saedyienh aen loqsiengj Cungguek .Boux cezyozgyah ndeu gangj gvaq:“cenzdungj mbouj dwg gij lozhoi soujmaenh,cix dwg gig miz cingzeiq bae feizmbaw cienzsoengq”.cijmiz cienzciep le“hungzswz gihyinh”,cij ndaej baenz boux caencinq cunghyoz hagseng.

  Daih dem daih gyoengq yinghyungz caeuq vunz miz dungzcaiz miz ceiqheiq gyaez guek yungh lwed caeuq mingh,vih raeuz bu coih le diuz roen doeng bae saedyienh aen loqsiengj Cungguek.Neix dwg cungj cingsaenz ligliengh hungloet,cengjhwnj le gij ndoksaen Cunghvaz Minzcuz.Raeuz aeu guh haenx dwg cienzciep gij cingsaenz ligliengh,yungh gij lwglan Cunghvaz gij dungzcaiz caeuq ligliengh,sawj guekcoj raeuz saenqhwng youh hungmbwk,mwnhoengh youh fouqgiengz;gijmaz dwg“ceng aeu guh aen seizdaih vunz moq ”?Couh dwg hawj raeuz youq yiengh seizdaih beigingj neix,gij eiqceiq de ciepswnj gij senhlez,yaengxsang lozfeiz hungzswz de,ciep gonq hai laeng,byaij liux gyoengq banlaux byaij mbouj sat gij loh haenx,byaij diuz roen raeuz daih vunz neix daegbied gag miz haenx.Neix daih dem daih gujli liux gij lwglan cunghvaz,vih Cunghvaz Minzcuz ndaej daih fukhwng bae giengiengz daengjsoengz、genhciz loqsiengj、daihdamj roemx baenaj!

  Cungguek hungmbwk,guekcoj raeuz ha!vihliux gij cunhyenz mwngz,bangeq buekmingh bae hoenx;vihliux mwngz mwnhoengh,daihboh dawz rap naek; vihliux mwngz ronghsag,daihlaeng daihdamj roemx baenaj!

  Gij lizsij daezsingj ciengxlwenx youq, Gij cingsaenz gyaciz ciengxlwenx youq neix.Daj aen dangj cib gouj daih daeuj yawj,“mboujlumz co sim,geiqmaenh sawjmingh,yaengx sang mbaw geiz hungmbwk yiengh seveicujyi miz daegsaek cungguek aen seizdaih moq,vih saedyienh Cunghvaz Minzcuz daih fukhwng aen siengjmuengh Cungguek neix bae roengzrengz guh mboujdingz ”gij lijsiengj saenqniemh gig sang gig ndei neix wnggai genhciz roengzbae,aeu cienzmienh gensez siujgangh sevei guh muzbyauh,aeu saedyienh aen loqsiengj Cungguek hungmbwk haenx guh fuengyiengq!

  Daiq miz gij saenqniemh giendingh caeuq miz saenqsim itdingh ndaej hingz neix,raeuz mbouj doenghngauz,mbouj gikgyang.

  Seizdaih cingqcaih baenaj,cienzciep“hungzswz gihyinh”fuengsik hix aeu caeuq seizdaih caez baenaj,caez bae cauh moq. “Hungzswz gihyinh”dwg diuz sai cingsaenz Cunghvaz Minzcuz raeuz,dwg gij Cunghgoz Gungcanjdangj gij haedsim cingsaenz.Dangguh boux cunghyoz hagseng ndeu,raeuz aeu“geiqmaenh lizsij,yawj baenaj,hawj lezsw cingsaenz caeuq raeuz caez byaij baenaj”;raeuz aeu gamj buek bae guh,dingj nanz bae guh;aeu gag ak mboujdingz,doglaeb gag guhcawj;aeu naihhaemz hagsib,cienzswnj aen gvanghyungz conzdungj Cunghvaz Minzcuz,gyaez guek gyaez dangj,nepsim laebceiq;aeu mbouj lumz lizsij gij indot,sim miz aen guekak miz ceiqheiq,roengzrengz hag gohyoz vwnzva cihsiz,gaemdawz caeuq henh’ok gij bonjsaeh gensez guekcoj,yungh gij saedsaeh hengzdoengh bonjfaenh bauqdap guekcoj.Cingj raeuz vih saedyienh aen loqsiengj Cungguek Cunghvaz Minzcuz daih fukhwng bae haenrengz buek guh!

  Doeksat,hawj raeuz itheij hemq:“seng gou Yenzvangz,gung gou Vazyah.Caj miz ndaej guh,bietdingh aeu bauq hawj Cunghvaz”!

  Docih daihgya!

Gungcanjdangj Dawzdox Guekcoj Engq Fouqmiz

共产党带领祖国更富强

  Guekgya ndaej fouqgiengz.

  Dang byaij daegsaek loh;

  Dangj lingjdauj cenzgoz,

  Byaij coh diuzloh fouq.

  Guh daegsaek sevei,

  Cingq ndei raeuz beksingq;

  Gungcanjdangj yinghmingz,

  Hawj beksingq fouqmiz.

  Ngux nyied rangz hwnj oiq,

  Cib nyied oij engq van;

  Dangj raeuz mbouj genjdanh,

  Guh fanzyungz cungguek.

  Miz raemx cij miz bya,

  Miz naz cij miz haeux;

  Miz dangj cij miz raeuz,

  Cingq rox naeuz fouqgiengz.

  Guh maenh ak cunghguz,

  Bouxboux cungj rox ndei;

  Minzcuj daeuj guenjleix,

  Guekgya seizseiz maenh.

  Duzbya mbouj hwnj mboek,

  Duzroeg baengh ndoengfaex;

  Minzcuj cawqceq saeh,

  Ndaej beksingq yungjhu.

  Vwnzmingz lumj rumzcin,

  Ci daengz sim vunz raeuj;

  Miz saeh cix doxnaeuz,

  Vwnzmingz daeuj banhsaeh.

  Daih dem daih roengzdaeuj,

  Bouxboux gangj vwnzmingz;

  Daengx guek hab diuzsim,

  Sevei vwnzmingz hoengh.

  Biengz maenh youh habdangq,

  Gaijgwz hailangh ndei;

  Bouxboux cungj baenzmiz,

  Cingq dwg ndei gvaq ciuh.

  Ranz doxhuz cix vuengh,

  Biengz habdangq cix swnh;

  Raeuz cibsamik vunz,

  Byaij hwnj roen siujgangh.

  Bouxhaenx bang bouxneix

  Ndei lumj beixnuengx caen,

  Bouxneix bang bouxhaenx;

  Caen lumj caemh ranz vunz.

  Biengz habdangq cix an,

  Ranz habdangq cix onj;

  Aeu vunz guh gaenbonj,

  Anonj gvaq ndwenngoenz.

  Raemx saw bya diuq angq,

  Va rang rwi daeuj coh;

  Daengx bouxgeq bouxcoz,

  Cwxcaih gvaq ndwenngoenz.

  Beksingq ndaej danggya,

  Gaiqmaz cungj mbouj heiq;

  Ndaej daenj raeuj gwn ndei,

  Mbouj hoj ngeix saek yiengh.

  Couhdawh doengzlumj sang,

  Vunz angq ndaej bingzdaengj;

  Boux seng gonq seng laeng,

  Cungj bingzdaengj doiqdaih.

  Doengz youq aen guekgya,

  Mbouj ngah naeuz doxcaengz;

  Bouxboux ndaej bingzdaengj,

  Daengx biengz ndaej huzndei.

  Guek raeuz iumj suenva,

  Bya raemx cungj gyaeundei;

  Yied yawj yied dwgeiq,

  Sim gyaez cungj mbouj caenh.

  Guek raeuz dangq ruz hung,

  Cung langh bongh baenaj;

  Gensez ndei guekgya,

  Gova angj doh biengz.

  Gungcanjdangj dawzdox,

  Guekcoj engq fouqmiz;

  Beksingq raen dwgeiq,

  Bouxboux gyaez ndawsim.

  Lwgminz dox huzndei ,

  Saedceij van iumj dangz;

  Miz saeh cix doxbang,

  Angqyangz gvaq ndwenngoenz.

Vahcuengh Mbanj Gou

我们村的壮话

韦海艳贵港市覃塘区蒙公镇民族初级中学八年级171班,

  Mbanj gou dwg aen mbanj Cuengh, vunz mbanj gou cungj gangj Cuengh. Gou gag nyinhnaeuz, Vahcuengh mbanj dou miz di daegsaek. Gou youq neix dan dawz aen vamingz

  daeuj gangj, mwngz couh rox daegsaek vah mbanj gou lo. Gou dajiq biek mbanjranz daengz seizneix gaenq miz geijcib bi lo, geijcib bi neix daeuj gou cungj youq baihrog guhhong, youq baihrog baenzranz , dauqma mbanjranz gig noix, bingzseiz hix mbouj miz vunz caeuq gou gangj vah mbanj gou. Hoeng gou mboujdan lij rox gangj vah mbanj dou, aen vamingz daegbied haenx gou lij geiqndaej maenhmaenh bae. Yienghneix gangj ha, aen vamingz couh lumj aen ndoengcoengz henz mbanj gou, mboujguenj gou raen gvaq geijlai bya sang bya hung caeuq bya mizmingz, daj iq daengz laux gou cungj lumz mbouj ndaej aen ndoeng henz mbanj, cungj gingciengz fangzhwnz loq daengz de.

  Aen vamingz neix heuhguh “ndaengngaeu”. Vunzraeuz bouxboux miz aen ndaeng, mbouj miz aen ndaeng baenzlawz diemheiq, mbouj miz aen ndaeng diemheiq couh dai vunz lo. Hoeng aen ndaeng vunz boux caeuq boux mbouj doengz, miz vunz aen ndaeng benj di, miz vunz aen ndaeng sang di. Vunz namzfueng caeuq vunz baekfueng doxbeij, aen ndaeng vunz namzfuung aeu benj lai di. Hoeng mbanj dou miz goenglaux he aen ndaeng de caeuq vunzmbanj mbouj doxdoengz geijlai, aen ndaeng de youh sang youh ngaeu, aen ndaeng de ngaeu lumj yienghlawz, vunzmbanj naeuz ngaeu lumj duz roeggyaeujmeuz. Dai lo, ngaeu baenz yienghhaenx lij baenzvunz ha, vunzmbanj miz di gangjboq lo.

  Goenglaux ndaeng ngaeu neix dwg goengseiq gou, vunzmbanj heuh de guh “goengndaengngaeu”, dwg aenvih de guhvunz ged lai. Bouxvunz ged caeuq ndaeng ngaeu miz maz gvanhaeh? Laxlawz dwg yienghneix: Vunzmbanj siengj ciq ngaenz goengseiq, de mbouj ciq couh suenq lo, lij maij aeu aen ndaeng daeuj “hwngj” sing ndeu, gij sing’yaem gig nanzdingq, yienghneix vunz couh heuh de guh “ndaengngaeu” lo. Goengseiq ged baenz yienghlawz, gou ndaejgeiq gienh saeh he gig cingcuj. Seiqcib lai bi gonq, seizhaenx ranzranz lij hoj lai, ra gwn cungj nanz ndaej gwn imq. Hoeng mboujguenj baenzlawz hoj baenzlawz gungz, bouxlaux mbanj dou gvaq cieng cungj aeu hawj lwgnyez fungbau. Daengz cieng le, dou lwgnyez cungj maij bae ranz vunz ndaw mbanj baiqnienz, daengz ranz vunz le, raen bouxlaux couh bak van gangj gawq “goengheij fatcaiz”! Bouxlaux couh hawj geij faen ngaenz fungbau. Seizdaih haenx cienz gig daejyungh, geij faen cienz couh doh cawx vanj faenj gwn lo. Bihaenx gvaq cieng, gou bae ranz goengseiq baiqnienz, siengj aeu aen fungbau he. Boh gou naeuz mwngz gaej bae lo, bae hix dwg faen cienz cungj aeu mbouj ndaej. Gou mbouj saenq vah daxboh, caiqgangj goengseiq lij dwg goeng gou, couhcinj mbouj caen geijlai hix dwg daxgoeng. Gou daengz ranz goengseiq le, dingqnyi de youq ndaw rug ae, couh youq rogding caj de okdaeuj. Caj bae caj dauq, gou dingqnyi goengseiq youq ndaw rug ok nyouh haeuj doengj bae yiengjsasa song baez lo, de lij ndoj gou mbouj okdaeuj. Seizdaih haenx vunz mbanj dou cungj dwg youq ndaw rug dwk aen doengj ok nyouh, mwngz nyouh gaenj ndoj ndaej gou, haex gaenj baenzlawz guh ne? Gou naengh maenhmaenh youq rogding caj goengseiq. Yaek gvaq buenq ngoenz le, goengseiq caen haex gaenj lo, de dingj mbouj ndaej le buet okdaeuj, gou sikhaek couh heuh naeuz “goengseiq goengheij fatcaiz”! De itmienh han itmienh buet ok rog bae naeuz “ok haex gonq”. Gij eiqsei de dwg mboujmiz seizgan hawj fungbau, gizsaed dwg siengj ndoj gvaqbae. Cajdaengz de dauqma ranz le, raen gou lij naengh youq ranz de. Baezneix de mboujmiz banhfap lo, gou riu dwk caj de hawj gou fungbau. Hoeng gou baenzlawz cungj siengj mbouj daengz, de dawz hoh oij he dangguh fungbau hawj gou……

  Gienh saeh neix gvaqbae geijcib bi lo, seizneix gou dawz daeuj gangj hawj lwg gou dingq, yaek son lwg guh vunz gaej ged lai.

  Hoeng gou youh siengj mbouj daengz, daeglwg baenzneix han gou:“Daxboh ha, mwngz naeuz goengseiq mwngz ndaeng ngaeu lai, vih maz aen ndaeng mwngz mbouj ngaeu ne? Aen ndaeng mwngz mbouj ngaeu, haih dwk gou ciep ndaej mwngz aen ndaeng hix mbouj ngaeu. Gou caen siengj bae guh soujsuz coih aen ndaeng bienq ngaeu bae!”

  “Mwngz uk baenzbingh ha? Aen ndaeng ndei ndei aeu guh maz soujsuz?” Gou mbouj rox daeglwg siengj gijmaz.

  Daeglwg gig nyinhcaen naeuz: “Daxboh mwngz hix rox boux yenjyenz gig mizmingz Yanghgangj heuhguh Liuz Dwzvaz, aen ndaeng de ngaeu ndaej gig baenz yawj, bouxcoz cungj maqmuengh miz aen ndaeng lumj de!”

  Gou youh lwnh daeglwg dingq: Vunz mbanj dou cungj naeuz bouxvunz ndaeng ngaeu ged lai.

  Daeglwg riu naeuz: “Daxboh ha, seizneix dwg seizdaih lawz le, Liuz Dwzvaz ndaeng ngaeu lai, hoeng de mboujrox gien geijlai ngaenz hawj bouxhoj gvaq!”

  Seizdaih gou riu ndaeng ngaeu, seizdaih lwg gou maij ndaeng ngaeu. Gou mbouj rox gangj maz ndei lo.

Gvaq Cieng Angq Lai

过年欢乐多

邓美芳贵港市覃塘区蒙公镇民族初级中学八年级172班

  “Duzgaeq biek hihlaeuh, duzma daeuj danggya; bimoq daeuj lona, coux bima sim’angq.” Hot fwen neix dwg boux canghfwen he ciengq aen cieng 2018, gij eiqsei dwg daengz cieng lo, vunzraeuz bouxboux vuenheij ranzranz angqyangz.

  Fungsug Bouxcuengh raeuz dwg yienghneix: Gvaq cieng aeu gangj vahndei saeh’angq, mboujndaej gangj vahcouj saehrwix, danghnaeuz lwgnyez luenh gangj vahcouj vahhaeu, aeu deng bouxlaux ndaq daengz gyaeuj ngaemngaem bae.

  Yienghneix gangj daeuj, gou aeu gangj di saeh’angq gvaq cieng ranz gou hawj daihgya dingq gonq. Vah dwg gangj ranz gou, gizsaed dwg gangj gij saeh sam ranz vunz: Ranz gou、 ranz dahnuengx、 ranz daegnuengx. Doengzseiz, youh dwg gangj gij saeh vunz sam daih dem: Daih goeng、daih boh、daih lan.

  Sien gangj saeh’angq daih goeng gonq.Bohda gou bineix ndaej 80 bi lo, seizgonq de youq Nanzningz aen yihyen ndeu guh canghyw, 20 bi gonq de rim 60 bi le duiyouh, wngdang youq ranz yietnaiq lo, de dauq daiq mehdaiq bae Gvangjdungh caiq ra hong guh—— Miz aen yihyen ndeu cingj de bae guh canghyw conhgyah, gvaqlaeng song bouxlaux youq baihhaenx cawx ranz youq lo, daengz seizneix song laux ngamq lw boux ndeu ma gvaq cieng lo. Bohda naeuz, de ma gvaq cieng ceiq siengj baema ranzcoj gvaq haemh ndeu.

  Ranzcoj bohda youq Sanglinz Yen, mbanj de dwg aen Mbanjcuengh. Nienz coit, dou buenx bohda ma ranzcoj. Seizgonq, aen mbanj de gungzhoj lai, seizneix bienq fouqmiz di lo, aenvih vunz mbanj rox dauz gim, geij bi neix haujlai bouxsai ndaw mbanj cungj bae daengz Feihcouh dauz gim, vunz cungj heuh mbanj neix guh “Mbanjdauzgim”.

  Baema daengz mbanj le, bohda angq raixcaix. De naeuz, seizgonq mbanj de cungj dwg ranznaez, seizneix dauqcawq hwnj ranzlaeuz suijniz moq, miz di ranzlaeuz guh ndaej ndei lai, caeuq ndaw singz gij ranzlaeuz bengz daengz geij bak fanh haenx ca mbouj geijlai. Ndaw mbanj lij miz haujlai ranz vunz cawx ndaej ci’gyauzceh dem. Yienghneix couh gvaiq mbouj ndaej miz vunz youq gwnz muengx raiz naeuz, Mbanjdauzgim fatcaiz lo, vunzmbanj bae dauz gim ndaej cienz lai cungj daengz Nanzningz cawx ranz, lij miz vunz aeu ndaej maex ndaem Feihcouh ma ranz dem. Dauqdaej dwg yienghneix lwi? Vunzmbanj lwnh dou dingq, gij vah gwnz muengx miz di gangjboq lo, gyoengq vunzmbanj bae Feihcouh dauz gim, dwg aeu mingh bae vuenh di cienz, lijaeu mbaet gwn mbaet yungh, rom cienz geiq ma ranz, seizneix gvaq cieng haujlai vunz cungj sij mboujndaej ma ranz, aenvih biuqfeihgih bengz daengz mbaw aeu 8000 lai maenz bae. Caiq gangj la, ndaw mbanj daengz seizneix lij caengz miz lwg lawz aeu ndaej maex ndaem Feihcouh ma ranz.

  Vunzmbanj youh naeuz, yienznaeuz ndaw mbanj caengz fouq lumj ndaw singz, hoeng geij bi neix baihgwnz bang guh loh suijniz、guh daizheiq moq、guh lohdaeng daiyangznwngz…… Seizneix ndaw mbanj gyanghaemh lohdaeng ronghsagsag, gyoengq mehmbwk haemhhaemh bae gwnz daizheiq diuq fouxgvangjcangz.

  Ndaw mbanj bienqyiengh lai dahraix, bohda raen le sim’angq lai lo. Dou laihnaeuz gij saeh neix dwg saeh’angq de lo, siengj mbouj daengz bouxlaux lij miz saeh engq angq: Bungz daengz bouxlaux ndaw mbanj roxnaj le, song goenglaux aeu Vahcuengh gangj daengz gij saeh seiziq, bohda angq daengz naj riu lumj boux lwgnyez yienghhaenx.

  Gangj gvaq gij saeh angq bohda le, couh gangj saeh’angq sam beixnuengx dou lo. Beixnuengx dou cungj gvaq 50 bi, yaek bienqbaenz bouxlaux lo. Bouxvunz yaek bienq laux le, cungj maij dawz gij saeh lwgnyez daeuj gangjgoj, lwgnyez ranz lawz doeg ndaej saw、ra ndaej gwn, bouxlaux ranz haenx couh bi daengz byai caeuq vunz cejdaihbauq. Bi’gvaq lwgnyez dou cungj guh ndaej bae di: Gou dwg daeggo, lwg gou ceiq hung, de youq aen singz hung he hwnjban, bi’gvaq ndaej danhvei yawjnaek di le, ngaenzhong ndaej lai gvaq gou lo; dahnuengx dwg beixnuengx daihngeih, bi’gvaq lwgmbwk de daihhag baetnieb le ndaej haeuj yihyen bae guh canghyw lo; daegnuengx dwg nuengx iq, dahlwg de lij doeg siujyoz, bi’gvaq ranz de cawx ndaej aen ranz moq, aen ranz moq liz aen cunghyoz mizmingz gig gyawj, ngoenzlaeng lwgnyez miz muengh ndaej haeuj aen hagdangz haenx bae doeg saw. Gij saeh dou cungj dwg saeh ndaw ranz, cungj dwg gij saeh iqetet, hoeng beixnuengx dou nyinhnaeuz saeh lwgnyez couhsuenq caiq iq, doiq dou daeuj gangj cungj dwg saeh ceiq hung, lwgnyez guh ndaej bae di ndeu, doiq dou daeuj gangj couh dwg saeh ceiq angq.

  Bouxlaux ndiepgyaez lwgnyez, lwgnyez couh rox hauqgingq bouxlaux. Haemhndaep, sam ranz dou gyonj gwn cieng, gou naeuz bi daengz byai bouxlaux dwgrengz lai lo, siengj dingq lwgnyez gangj di vah ndeidingq. Sam boux lwgnyez cungj naeuz ndei. Lwg gou gangj gonq, de naeuz gvaq cieng daj singz hung baihrog ma Nanzningz, raen bohmeh byoemgyaeuj caengz hau liux, ndangdaej lij suenq ndei, de sim’angq raixcaix, gou caeuq mehyah dingq le ndaw sim raeujrubrub; dahlwg dahnuengx naeuz de ndaej haeuj yihyen bae guh canghyw, bohmeh daj de iq daengz hung causim lai lo, seizneix caengz geq geijlai byoemgyaeuj cungj hau liux, de baenzseiq vunz aeu hauqgingq bohmeh, bohmeh de dingq le raemxda conh lo…… Daengz dahlwg nuengx iq gangjvah, de najmong lai ndoj daengz baihlaeng daxmeh bae,dou heuh bae heuh dauq de cungj mbouj guhsing. Hix gvaiq mbouj ndaej de, nienzgeij de iq lai, yienznaeuz de caeuq song boux hung dwg beixnuengx, lij suenq guh beixnuengx caen dem, aenvih sam boux cungj dwg lwgnyez dogseng, nuengx ranz au、nuengxbiuj couh dwg nuengx caen lo. Hoeng sam de nienzgeij ca daiq lai lo: Daeggo hung gvaq dahnuengx iq 20 bi, dahcej hung gvaq dahnuengx iq 15 bi, song boux hung caeuq boux iq mbouj doengz seizdaih, baenzlawz gangj ndaej daeuj ne.

  Gvaq yaep he, siengj mbouj daengz dah iq guh gienh saeh geizheih he.De rag fwngz dahcej naeuz:“Song raeuz doxdax ban fwngz?”Dahcej naeuz:“Mwngz ngamq 10 bi, baenzlawz ban ndaej gvaq dahcej?” Daxmeh nuengx iq naeuz:“”Gaej gangj hw, de vunz iq rengz hung lumj duzguk, caeuq doengzhag ndaw ban doxdax ban fwngz, bouxboux cungj saw de liux.” Song cej nuengx doxdax ban fwngz gvaq le, dahcej caen deng dahnuengx gaemh fwngz roengz bae.

  Dou bouxlaux doq riu doq naeuz:“Haengjdingh dwg dahcej nyiengh nuengx iq.” Sawqmwh, dahnuengx iq buet daengz baihlaeng daeggo bae, song fwngz got maenh ga daeggo, sikhaek ok rengz umj daeggo hwnjdaeuj…… Yienznaeuz de ngamq umj ndaej hwnj di ndeu, hoeng daeggo miz baenz bak lai gaen hw.

  Dou bouxboux cungj doeksaet yat.

  Dahnuengh iq naeuz:“Sou cam gou guh saeh maz ceiq angq, neix couhdwg saeh ceiq angq gou.”

Raq Raq Sing Duzbid, Boux Daeujnguh Rox Mwngz

阵阵蝉音,迟到者懂你

黄春菊,武鸣区太平镇庆乐小学    

  Youh dwg aen seizhah, gou nyoengxhai aen cueng, rog cueng gijndit lwenqda raixcaix. Seizneix gou dingqnyi raq raq sing duzbid swenj riengz gij heiqhom dujva bongj haeuj ndawfuengz daeuj. Gou mumjgyumq ngaexhwnj miz gienh doxgaiq ngaiz namhfoenq gyuj le haujlai nanz he , couh vaiq daj ndawgvih cuengqsaw fan yawj. Mbouj geijnanz, de yat haeuj lwgda gou daeuj, yienznaeuz gyuem le caengz saekcaij lauxgaeuq ndeu, hoeng vanzlij baenzhaenx ndeiyawj. Ngaexdauq gij seih gaxgonq gamjdaengz yienghhaenx unqswnh, nanzndaej gvejduenh.

  Gou ndaej 11 bi seiz, daengz yienhsingz Minzcuz cunghyoz bae doegsaw. Dangseiz, geij dungq ranzlouz gaeuqgeq he, seiqhenz cungj dwg faex hung mwncup, caiqlij miz aen giuzcangz ndeu , neix couhdwg aen hagdangz gou lo. Geiqndeij haemh haenx 10 diemjcung gvaq lo, sing doegsaw ndaw gyauqsiz lij goksadsad, bakdou cix yiengjhwnj sing “Bauqgau” gig mbouj habdangq daeuj. Miz boux dahmbwk cix nyaenq cix lausemsem he menhmenh nyoengxhai aen dou, baenz mbiengj lai naj cungj yo youq ndaw buhgoeb de. Ndaw gyausiz sikhaek riucumcum hwnjdaeuj, gij sing caepbaenz diuz veizciengz sangngaungau he, de nanz ndaej byaijcoh diegnaengh swhgeij.

  Lauxsae baez maenj sing ndeu, cijndaej dawz gij sing cabluenh ndaw gyauqsiz naenx roengzbae dingzlai. “Yenz Cingvwnz, daeuj lingx ciengj!” Boux mbeiloet ndeu mauh conzvah neix okdaeuj. Yenz Cingvwnz laihnaeuz dwg conzvah byonj , lwgda myonz dwk cimyawj boux doengzhag mbeiloet neix. Byawz rox lauxsae caen dwg cuengqroengz dug fwnjbit gwnzfwngz de, fajfwngz de uq rim gijfoenq fwnjbit daj bonj gyauqan baihlaj dawz ok bonj bizgibwnj ndeu ndenq aeuhawj Yenz Cingvwnz. “Haggaez neix mwngz cinbu gig daih,” Lauxsae unqswnh dwk naeuz“Dang ndaej ndaw ban raeuz boux daihit mingz baezndeu lo. Baezlaeng lai roengxrengz, ceiq gaej daeuj nguh lo bw.” Yenz Cingvwnz fajnaj hoengzmyanmyan, songfwngz ciep gvaq bizgibwnj, vaiq dawz daehsaw cuengq roengzdaeuj, naengh youq henzndang gou.

  Lwgda gou baez rezyawj bizgibwnj gwnzfwngz de, ndawsim gagngaex “caen ndae ya!”Fungmienh dwg yienghhaenx ndeiyawj, aen caujyenz yawj mboujdaengz gyaeuj caeuq aen mbwnlamz doxgap, go byaeklinzgaeq seiqlengq diuqfoux, aen ciloek ndeu cap youq gizgyae menhmenh cienqdoengh, gwnz fuk dozveh yienznaeuz mboujmiz saek aen ngumhngaeuz vunz, hoeng miz gyaq danci saekhoengzmeiq he dingzyouq henzloh. Daengx fukveh cungjdwg jij gingsiengq saezhah, moqsaen gyaeundei, youq mbiengjgwnz dozveh vanzlij miz soujsae ndeu ,gou lij mboujgib cungjcaengz yawjndaej cingcuj ne.

  Ndawsim gou saenqdoengh lo, gij maqmuengh yaepyet couh cungrim ukgyaeuj, lauxsae youq gwnzdangz gangj gijmaz gou di ndeu cungj dingq mbouj haeuj rwz.

  Roengzdangz le, Yenz Cingvwnz lizhai gyauqsiz, gou muengh dwk aen ngumhngaeuz de youq soujlangz daemxgyaeuj siusaet lo. Gou laeglemx byaij ma daengz aen diegnaengh. Gou yutdauq fajfwngz ngamq bae fan aen daehsaw de , ndaekgaemz ndaekgaemz ndoet gwn raemx, siengj lumz le swhgeij dwg bouxvunz damsim ndeu. Hoeng, diuz lahlen aen daehsaw Yenz Cingvwnz lijdwg deng gou rag hai lo, bonj bizgibwnj haenx couh deng gou seuqset dwk vuenh aen “rongz” wnq.

  Gij angqwt ngamq youq ndawsim baez fit gvaqbae, gou cix naengh dwk lumj hangx deng cimcamz ityiengh, mboujyouz dwk buet ok gyauqsiz bae. Ndwn youq laj gofaex, dingqnyi duzbid gwnzfaex swenj mboujdingz, ndawsim gou cugciemh bingzdingh roengzdaeuj. Seizhaenx gou yawjraen Yenz Cingvwnz cix youq giz liz gou mboujgyae haenx nyinhcaen boihsaw ne. Seizneix yawjraen daengz swhgeij dwg bouxvunz dan goq bonjfaenh , cij mboujgvaq dwg boux baujciz “sam faencueng ndat” he.

  O! Gou couh lumj bouxcaeg nei, daj aen vih baujgviq boux daihit mingz haenx dawz aen gveiqgvanh de gej roengzdaeuj, caiq oet haeuj ndaw daeh bonjfaenh bae. Mbouj, mboujndaej yienghhaenx guh, gou itdingh yaekaeu boiz hawj de.

  Cingq dang gou conghbak gag gangjdemhdemh saez, boux doengzhag ndeu buet gvaqdaeuj, diemheiq baegfofo dwk naeuz:“Siuj yenz, vaiq ha , vaiq bae ma sousib doxgaiq mwngz ba! Boux doengzhag aen ban wnq gangjnaeuz lumz gonjgangbit de youq gizhaenx, dawz doengjdaiz caeuq daehsaw mwngz bokluenh vanq youq gwnzdieg liux lo…….” Dingq daengz haenx, ndoksaen baihlaeng gou gamjdaengz liengzsausau, mbouj daengj de gangjsat, ngeuxgyaeuj couh vaiq coh gyauqsiz buet baema, doq buet doq ngaex : Ciengaez gaej deng Yenz Cingvwnz fatyienh bw.

  Caj gou ganjdaengz saez, Yenz Cingvwnz gaenq bang gou sousib doxgaiq ndaw daehsaw ndaw doengjdaiz seuqset lo.Gou vuengmuengz rag hai diuz lahlen daehsaw, gamjdaengz caiq miz buenz raemxgyoet ndeu raix roengz dingjgyaeuj gou daeuj, bizgibwnj lij youq ndaw daehsaw gou ha, dandwg vuenh gizwnq cuengq lo. Gou ngiengxhwnj fouqda lausemsem yawj de, mboujrox de yaek doiq gou gangj jijmaz guh jijmaz ne? Fouqda loet de caeuq fouqda gou doxmuengh, hawj gou roxnyinh yienghhaenx raeujrub, lumj yaek gangqhawq gij hanh gwnzndang gou bae. Gou mbouj ndaej hoengq lai ngaex di he, gig’vaiq dwk dawz bonj bizgibwnj yut okdaeuj, mboujrox baenzlawz gangj, cij ndaej singdaemq dwk naeuz conz“doiq mboujhwnj lo”. De mbouj ietfwngz ciep aeu, cix doiq gou riuhihi naeuz:“Gawqyienz mwngz haenj bonj neix, couh dawz bae yungh ba.”

  Rogcueng duzbid swenjrengreng, gij sing ndeidingq hawj vunz meiz, sawqmwh fwt siengj hwnj conz sei gou caengz doeg sat haenx: Daengngoenz roengz bya yawj lumj fouz cingz saed miz cingz, Duzbib gwnzfaex ndawsuen singgok swenj mboujdingz.

Daxboh Bak Raemh

父亲爱唠叨

谭泳洁,贵港市覃塘区蒙公镇民族初级中学八年级176班

  Youq ndaw yienhsieng gou, mboujguenj dwg saeh hung saeh iq, daxboh cungj maij mboen bae raemh dauq.

  Seiz gou ngamq doeg siujyoz, daxboh couh hainduj youq henz rwz gou raemh:“Daegdi, mwngz yawj mwngz, cozyez guh ndaej baenzneix rubrab, gij loek baenzneix lai, caen vut naj boh mwngz, boh mwngz dwg lauxsae bw, hawj gou nyinhcaen di.”

  Seizde gou lij iq, mbouj roxsoq, raemh couh raemh lo. Hoeng, gou doeg daengz cuhcungh, daxboh lijdwg ciengzseiz raemh:“Daegdi, mwngz hix hung lo, wnggai rox gag hagsib lo, baenzlawz lij cungj dwg hawj gou caeuq meh mwngz gangj baenzneix lai ha? Daengz mwngz cuhcungh bizyez, danghnaeuz gauj mbouj ndaej gauhcungh, gou yawj mwngz cij ndaej bae gwnz ndoi cuengq vaiz lo.”

  Ceiq hawj gou simfanz dwg, gou dang lauxsae le, daxboh lijdwg raemh. Mwh gou ngamq dang lauxsae, aen singhgiz satbyai dauqma daengz ranz, de cungj caeuq gou gangj baenzlawz baenzlawz doiqdaih hagseng, baenzlawz baenzlawz cij ndaej guh ndei gij saeh sonhag. Hainduj, gou lij nyinhcaen bae dingq, hoeng nanz le, couh roxnyinh gig simfanz: Gou gaenq dang lauxsae baenzlai nanz lo, youh youq conhyez yozyau hagsib gvaq, gij neix gou mbouj rox ha, yungh mwngz naeuz baenzneix lai?

  Gvaq le geij bi, daxboh youh haidaeuz raemh aen saeh wnq: “Daegdi, mwngz hix mbouj iq lo, wnggai ra yah lo, gaej doeng genj sae genj, genj dwk da va bae, ra yah ceiq youqgaenj dwg yawj dahsau de gaenz guh hong, rox guenjgya, rox gingq meh mwngz couh ndei. Gaej caenh yiemz boux neix mbouj gyaeundei, boux haenx youh mbouj lengj, gyaeundei ndaej dang haeux gwn ha?” Aen vah neix lienzdaemh lai bi, moix baez gou dauqma daengz ranz, itdingh dingqnyi, loengh dwk gou moix baez baema cungj caeuxcaeux deuz dauq bae yozyau.

  Doeksat gou gezvwnh lo, youq bihaenx daengz cietcingmingz sauqmoh, gou baez daih’it daiq yah ma ranz, dinga daxboh mwhhaenx gaenq mbouj lingzbienh lo, hoeng lijdwg gaemh gaenj dwngx he, saemxsaemx saxsax cengqgengz caeuq dou benz hwnj aen dat lingq he bae sauqmoh, baenzlawz gienq de hix mbouj dingq.

  Dangzsauj gej naeuz:“Mwngz mbouj rox, dinga daxau mbouj lingzbienh, sauqmoh geijlai bi cungj mbouj ndaej daeuj lo. Bineix mwngz baez daih’it daiq yah mwngz dauqma, de sim’angq ne. Ndigah itdingh aeu daeuj docih cojcoeng baujyouh, mwngz couh hawj de riengz hwnjbae ba, yienghneix de cij ansim.” Dingq gij vah beixsauj, gou rex daxboh benz coh gwnz bya, seizhaenx lwgda gou mbaeqmbaeq bae, ndawsim gou hix cij hainduj roxnyinh vih maz daxboh baenzneix gyaez raemh bak……

  Gvaq le geij bi, daxboh seizheiq mbouj ndei, baenz cungj bingh bouxgeq ukmwnh ndeu. Ciemhciemh, gou ma ranz de hix mbouj roxnaj gou lo. Gou naengh youq henz de, gig siengj dingqdingq de riengz gou gangj vah, hoeng de cix caiq mbouj gaen gou gangj coenz vah gvaq. Hoeng, daxmeh lwnh gou naeuz:“Daxboh mwngz seizneix yienznaeuz mbouj roxnaj mwngz, hoeng de lij ndaejgeiq mingzcoh mwngz, mwngz mbouj youq seiz, mizseiz de uk cingsingj di, couh cungj cam gou ‘Daegdi bae gizlawz lune? De ra ndaej yah caengz?’ Gou lwnh de mwngz gaenq ra ndaej yah lo, de cix caem roengzdaeuj.” Dingq gij vah daxmeh gangj neix, youh yawjyawj daxboh mbouj roxnaj gou, gou raemxda dumh naj—— lauheiq dwg vih gou ra yah dwg daxboh cuengq youq ndawsim lai bi ba, de geiq mbouj ndaej gou gaenq gezvwnh, hoeng de lijdwg geiq ndaej aeu ra yah hawj gou! Mwhhaenx, gou geijlai siengj daxboh ndaej roxnaj gou, caiq raemh bae raemh dauq hawj gou dingqdingq ha!

  Seizneix, daxboh gaenq biekliz dou bae geij bi lo, moix baez dauqma daengz ranz, gou yawjraen aen fuengz daxboh youq gvaq, seizneix hoengqvangvang, gou naengh youq henz daxmeh, dingq daxmeh lumj daxboh nei raemh bae raemh dauq, gou mbouj roxnyinh fanz lo, caeuq de menhmenh gangjgoj dwk, seiz mbouj seiz dap coenz vah he……

  Daengz seizneix, gou fwt roxnyinh, bingzseiz raeuz naeuz bohmeh bak raemh, gizsaed dwg raeuz simdaiq mbouj ndei, danghnaeuz mwngz rox bohmeh vih maz bak raemh, mwngz couh mbouj roxnyinh fanz lo!

  Ai, daxboh bak raemh, raeuz ciengzseiz mbwq bohmeh bak raemh, hoeng, ciengzseiz dwg daengz doeklaeng raeuz cix yawjraen, youq gij vah raemh bae raemh dauq ndawde, dwg gij gyaez naekgywggywg bohmeh ha!

Daxmeh

冯佩琳,武鸣区民族中学?

  Mwh lij’iq,gou mbouj rox daxmeh guh gijmaz hong,caenh rox de ciengzseiz caeux caeuxcaeux couh okbae,laeplaep cij haeuj ranz.Mwhhaenx gou gig noix ndaej raen naj daxmeh,aenvih gou caengz hwnq,daxmeh couh okbae lo;doengxhaemh gou ninz ndaek lo,daxmeh cij dauq.Mwh ndaej hoengq,gou couh cam daxboh:“Daxboh,gou haujlai nanz mbouj raen daxmeh lo,daxmeh bae guh gijmaz la?”Daxboh naeujnaeuj fajnaj gou,naeuz:“Daxmeh gig hungmbwk,de ndaej dawz aen singz raeuz bienq ndaej engq gyaeundei,de dwg boux ‘cwngzsi meijvaswh’!”Dingq daengz gij vah daxboh, ndaw sim gou gig angq,caemh vih miz boux daxmeh yienghneix roxnyinh miznaj.Bingzseiz roeb vunz,gou cungj gig miznaj dwk doiq de naeuz :“Daxmeh gou dwg ‘Cngzsi meijvaswh ’!”

  Ciemhciemh dwk,gou majhung lo,caemh roxdaengz daxmeh gizsaed dwg boux sauqgai,ndigah,doeg siujyoz,gou gig noix youq dangqnaj gyoengq doengzhag dwen daengz daxmeh.Miz baez ndeu,roengzdangz le,dou geij boux gvaengz youq itheij lwnh goj,dang lwnh daengz “gunghcwngzswh”aen swz neix seiz,Yangz Vaz saenzheiq dwk naeuz:“Meh gou couh dwg boux gunghcwngzswh mizmingz ndeu!”Dingq de yienghneix naeuz,gyoengq doengzhag bouxboux cungj foenfoen naeuz meh bonjfaenh dwg guh gijmaz,gou ndwn youq gizhaenx mbouj gangj saek coenz vah.Sat le,miz vunz cam gou:“Gyah,meh mwngz dwg guh gijmaz la?”Gou doeksaet lo,dwddwd daddadj dwk naeuz:“Cam……ma……guh gijmaz?Rox doengh…… gijneix ……doiq sou miz gijmaz ndeicawq?”Gangj sat,gou ganjvaiq deuz lo,mbouj rox bouxlawz naeuz :“Gaej cam de lo,gizsaed daxmeh de dwg boux sauqgai ndeu!”“Boux sauqgai……”Miz vunz sing sang dwk hemq naeuz,gaenlaeng,haujlai vunz cungj riu hwnj daeuj.Mwh haenx gou gig haemz,caen siengj ra aen congh ndoj haeuj ndaw de bae cwenxlwenx mbouj okdaeuj,ndaw sim gig huj daxmeh:Guh gijmaz mbouj ndaej,bae guh boux sauqgai!

  Daj mwhhaenx,gou dawz bonjfaenh fung hwnjdaeuj,mbouj caiq caeuq gyoengqdoih gangjgangj riuriu,caemh mbouj hawj daxmeh daeuj hagdangz cimh gou. Mboujguenj hai gijmaz hoih,gou cungj dwg hawj daxboh daeuj,caengz hawj daxmeh daeuj saek mbat.

  Baez ndeu,yaek cuengqhag seiz,mbwn bienq ndaej laepcupcup,yaepyet fwnraq dongj roengzdaeuj lo.Gou muengh dwk:Sat lo,daxboh okcai lo,mbouj ndaej daeuj ciep gou lo,bingzseiz gou youh raengq daxmeh mbat dawz mbat,mbouj cinj de oknyienh youq ndaw hag dou,seizneix yaek baenzlawz baema ne?Cingqdang gou mbouj rox baenzlawz guh seiz,lauxsae byaij daeujdaengz henz ndang gou,ndaw fwngz de gaem aen liengj ndeu,naeuz:“Cingq nyap mboujmiz vunz soengq liengj daeuj,mbouj rox baenzlawz guh?Dwg lwi?”Gou ngaekngaek gyaeuj,lauxsae ciep dwk naeuz:“Hawj mwngz,daxbaenh miz boux mehmbwk ndeu soemh fwn soengq daeuj hawj mwngz……”Gou gipmuengz cabvah:“O,de lij gangj gijmaz lwi ?”“De caenh daengqnaeuz,mbouj hawj mwngz soemh fwnhung baema,deq fwn haemq iq le cij ndaej baema ranz.De caen gvansim mwngz,bonjfaenh deng dumz liux lo,lij mbouj guenj,fanj gvaqdaeuj dwg lau mwngz deng dumz.”Lauxsae gangj coenz vah neix sat le,couh byaij okbae lo,gag louz gou youq gizhaenx……

  Fwn menhmenh bienq iq lo,gou ganjgip gang liengj yiengq ndaw ranz buet.Gou gannaeuz daxmeh baenzbaenz youq ranz,hoeng,gou yamq haeuj bakdou seiz,ndaw ranz caemrwgrwg,caengz raen gij ngumhngaeuz daxmeh.Fwn caengz dingz,de bae gizlawz ne?Gou ngeix dwk.Nanzdauh lij bae sauqgai?Gou doq siengj doq byaij ok bakdou,yiengq gizdieg daxmeh bingzseiz sauq haenx buet bae ……

  Daengz gizhaenx,gou dauqcawq ra gij ingj daxmeh,hoeng,baenzlawz hix ra mbouj raen. Dauqdaej youq gizlawz ne?Gou ngeix dwk.Suenq lo,lij dwg baema ba.Siengj daengz neix,gou yaek yamq din byaij dauq ma seiz,raen henz aen ci ndaem ndeu gvaengz miz haujlai vunz.

  Fatseng gijmaz saeh lo?Gou naemx mboujndaej byaij gvaqbae,caenx haeuj ndaw vunz lai bae,baez yawj, raen daxmeh ndwn youq gizhaenx,boux hauxseng ndeu aeu fwngzyinx yinx haeuj laeng daxmeh bae naeuz:“Mwngz suenq gijmaz doxgaiq?gamj loengh uq aen ci gou,aen ci gou dwg baujmaj,danghnaeuz deng va,mwngz boiz ndaej hwnj lwi?”Daxmeh ndwn youq gizhaenx,mbouj gangj saek coenz vah,caenh dingq boux hauxseng neix ndaq , “Gou mbouj guenj lo,mwngz sikhaek dawz de swk cengh,mbouj ne,gou sikhaek dawz gij doxgaiq mwngz fwx fak liux bae,caemhcaiq naeuz lingjdauj mwngz nyi,hawj mwngz mbouj miz hong guh!” Dingq daengz neix,gou naemx mbouj ndaej lo,siengj cung hwnjbae,rag daxmeh baema,hoeng,cingqdang gou yamq din okbae seiz, daxmeh gangjvah lo:“Daegmbauq,dwg gou sauq mbouj siujsim,hawj aen ci mwngz deng uq di naez lo,gijneix dwg gou loek,doiq mbouj hwnj lo,mbouj yungh mwngz naeuz,gou cungjdwg wnggai dawz aen ci mwngz swk cengh, hoeng,mwngz gangjvah caemh aeu miz cikconq,gou dwg boux sauqgai, mbouj loek!Hoeng,mwngz mbouj wnggai yawj mbouj hwnj gyoengqdou,danghnaeuz mboujmiz gyoengqdou,aen ci mwngz engqgya uq!”Coenz vah neix baez dingz,seiqhenz yiengj hwnj sing bekfwngz gig gok , haujlai doiq boux hauxseng yinxyinx gangjgangj,boux hauxseng neix baez dingq le naj hoengzyatyat,vut conz vah ndeu naeuz:“Suenq lo,suenq gou boihseiz,mbouj caeuq mwngz gangj baenzlai.”Gangj sat le,ganjvaiq ndonj haeuj ndaw ci bae,hai deuz lo.

  Seizneix,fajnaj gou caemh gig ndat:Dwg a,daxmeh vihliux mbouj hawj gyoengqdou ngoenznaengz swnghhoz youq ndaw nyapnyaj,gaiq hong de dwg aeu boux ndeu uq vuenh daeuj haujlai vunz cengh ya!Nanzdauh gou lij yawj mbouj hwnj daxmeh la?Gou lij dwg dahlwg de lwi? Gou mbouj caiq ngeix baenzlai,sam yamq gyoeb guh song yamq byaij daengz dangqnaj daxmeh.Daxmeh baez raen gou,doeksaet dwk naeuz:“mwngz daeuj gizneix guh gijmaz?”Gou naemx mbouj ndaej lo, daej dwk got dawz daxmeh naeuz:“Meh,gou loek lo,mbouj wnggai yawj mbouj hwnj mwngz, yienzliengh gou,ndaej lwi?”Daxmeh doq swk raemxda hawj gou,doq naeuz:“ Dahlwg huk gou,daxmeh caengz huj mwngz gvaq,gaej daej lo,vaiqdi dingz roengzdaeuj ba,mbouj ne cix bienq ndaej yakyawj lo,yienghhaenx,daxmeh couh mbouj gyaez mwngz lo.”Dingq gij vah daxmeh le,gou sikhaek swk cengh raemxda,doiq daxmeh naeuz:“Gou caeuq mwngz itheij sauq ba!”“Ndei!”Daxmeh hannaeuz.

  Gyoengq vunz gvaengzyawj haenx youh bekfwngz hwnjdaeuj, boux vunzlaux ndeu naeuz:“Dahniq ha, meh mwngz gig gaenxhong,cijaeu lwnzdaengz de sauqgai,gizdieg neix cungj dwg seuqsatsat,hawj vunz roxnyinh sim gig langh.Mwngz ndaej lijgaij daxmeh couh baenz lo.Roengzrengz guh!”Gij vunz lw haenx caemh yaengx hwnj lwgfwngzmeh,mwhhaenx,gou raen miznaj dangqmaz, gaem hwnj sauqbaet,caeuq daxmeh itheij sauq hwnjdaeuj……

编辑:mzb

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部