当前位置: Sawcuengh > saehmoq

Sihlinz Banh Aen Ban Son’gyauq Sawcuengh Geiz Nduj Bi 2019

2019年03月13日    来源:广西民族报网    字号:[    ]

  Ndwen 3 ngoenz 2 daengz ngoenz 3, ndaw funghranz haihoih Sihlinz Yen Dangjyau, vunz lai dangqmaz, fwen gak minzcuz ndeidingq goksasa, buhvaq gak minzcuz ronghsag lwenqda, gizneix cingq banh aen ban son’gyauq Sawcuengh geiz nduj Sihlinz Yen. Baez ban son’gyauq Sawcuengh neix banh song ngoenz.

  Baez hozdung neix dwg baez songyauq Sawcuengh hamj sengj gih、lai aen minzcuz caeuqfaenh ndeu, miz gyoengq bouxgyaez Sawcuengh ndaw yienh Sihlinz caeuq gak yanghcin aen yienh neix, Guengjsae Lungzlinz、Denzlinz、Bingzgoj、Majsanh caeuq Yinznanz Swngj Gvangjnanz Yen Bouxcuengh、Bouxmyauz、Bouxyauz、Bouxgun、Bouxyaej daengj 5 aen minzcuz gungh 130 lai boux caeuqfaenh son’gyauq.

  Mwh hwnjdangz, bouxhag nyinh- caen dingq lauxsae, raiz bitgeiq, gaenxmaenx hoizdap lauxsae. Youq song ngoenz dinjdetdet neix, 130 lai bouxhag hag rox le doeg caeuq raiz 108 aen yinhmeh Sawcuengh, vih coglaeng hag caeuq geiqraiz Sawcuengh dwk roengz giekdaej maenhsaed. Haemhhaenx, aen ban son’gyauq lij banh le aen vanjvei yienjheiq iq ndeu. Mwh yienjheiq, gyoengq bouxhag eu fwen、 diuqfoux、 roq gyong roq laz、yienj vaiqbanj, langhbaij gij dungxcaiz bonjfaenh, cezmuz ndeiyawj lai dangqmaz.

  Sihlinz Yen dwg aen yienh lai aen minzcuz comzyouq ndeu, daengx yienh minzcuz vunznoix ciemq cungjgyaeujvunz 90% doxhwnj. Geij bi neix daeuj, aenvih bungz daengz gak cungj yienzaen yingjyangj, Vahcuengh Sihlinz Yen yied daeuj yied bienq Gun lai, gaenq miz gij goek hux ngaiz siusaet bae. Vihliux ciengjgouq caeuq swnjcienz gij vwnzva Vahcuengh, Aen Yozvei Cuengh Sihlinz Yen gaenxmaenx haiguh hong son’gyauq Sawcuengh. Ginggvaq caepcawq ca mbouj geijlai song ndwen, aen ban son’gyauq Sawcuengh Sihlinz Yen dawzseiz haiban.

  (Vangz Civeij Lij Gencungh)

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部