当前位置: Sawcuengh > saehmoq

Dasinh Yen Mbanjmingzsw Ndaej Senjhaeuj Aenmbanj Youqgaenj Lijyouz Lajmbanj Daengx Guek

2019年07月31日    来源:广西民族报网    字号:[    ]

  Mboengqneix, Vwnzva Caeuq Lijyouzbu goengbouh le mingzdan lajmbanj buek daih’it yaek ndaej senjhaeuj gij mingzloeg aenmbanj youqgaenj lijyouz lajmbanj daengx guek, Gvangjsih ndaej haeuj 11 aen yangh, Dasinh Yen Ganhhih Yangh Mbanjmingzsw gwnz buengj miz mingz.

  Dasinh Yen Ganhhih Yangh Mbanjmingzsw daengx bi gingjsaek lumj veh gyaeundei raixcaix, miz gij mingzdaeuz “bya dah valangz” caeuq “diegyouq bouxndoj”, Dahmingzsw raezrangrang lae gvaq daengx aen Mbanjmingzsw, henz dah doenghnaz gvangqlangh, aenmbanj gyaeundei caeuq henz dah giuzfaexdog、nyezcuengqvaiz gwih vaiz、vunzguhnaz gvak naz daengj gij gingj doenghnaz, yienh'ok fuk veh doenghnaz miz bya miz raemx、bouxsai guh hongnaz bouxmbwk daemjbaengz ndeu.

  Aenmbanj neix baengh gijndei guekgya 4 A gaep Mingzsw lijyouz gingjgih caeuq swcigih hajsing gaep Mingzsw lajmbanj lijyouzgih, gyavaiq hwngfat lijyouzyez Mbanjmingzsw. Yinx haeuj aen giyez ndei douzcienz, haifat gij lijyouz swhyenz Mbanjmingzsw, hwnjguh gingjgih、ranzdozninz、nungzgyahloz、 aen bouq gai huq lijyouz miz daegsaek daengj, doengzseiz, hix haenqrengz doicaenh hwnjguh gij giekdaej sezsih goenggungh, hwnjguh lijyouz yizcan(hamz diengzhaex)、diuzroen heu lijyouz、diuzroen byaij gwih ci daengj, vih bouxhek daeuj youz Mbanjmingzsw gunghawj gwn、youq、byaij、youz、cawx、guhcaemz daengj fugsaeh, coicaenh Mbanjmingzsw lijyouz ndaej laebdaeb hwngfat. Hwngfat lijyouzyez, gyalai gij souhaeuj vunzmbanj Mbanjmingzsw, daiqdoengh daengx mbanj cizdij ginghci hwngfat. Bi 2018, aen mbanj neix ginghci souhaeuj 2760 fanh maenz, daengx bi ciepdaih bouxhek 217.54 fanh vunzbaez, vunz guh hong lijyouz 383 vunz, vunzmbanj bouxvunz bingzyaenz bi souhaeuj 11862 maenz.

  (Liengz Gveivah/梁桂花)

编辑:蒙树起

扫描二维码
关注本报官方微信

本报投稿邮箱:

gxmzbzb@163.com

gxmzb2@163.com

回到顶部